VOV4.Jarai - Kơ-iăng Khua dêh čar ta ơi Lê Minh Khái (Khua Grŭp hyu mă bruă mrô 2 mơng Khua dêh čar kơ pơtrut kơtang pơsir prăk tuh pơplai bruă hrom) phrâo git gai jơnum kiăng pơtrut pơsur, pơtlaih tơlơi tơnap, tơlơi gun, pơtrut kơtang prăk pơsir tuh pơplai bruă hrom thun 2022 pioh kơ 8 ding jum, ƀirô Kơnuk kơna 4 bôh plơi pla. Tui Ding jum wai lăng kơčăo bruă hăng tuh pơplai, abih bang kơčăo bruă tuh pơplai ngăn drăp kơnuk kơna thun 2022 Khua dêh čar ta jao kơ 8 ding jum, ƀirô hăng 4  bôh plơi pla (Gah Grŭp hyu mă bruă mrô 2) lĕ rơbêh kơ 24.700 klai prăk. Truh abih blan 7, yap him lăng abih bang prăk pơsir mơng 12 bôh anom lĕ giăm truh 7.400 klai prăk, hmâo năng ai ñu 30%. Tui hăng Kơ-iăng Khua dêh čar ơi Lê Minh Khái, pơsir prăk kaih hmâo lu bôh than ba truh, samơ̆ pơpha prăk kaih yua kơ ƀu đing nao yơh phun ñu. Rơkâo hơdôm Ding jum gơnong bruă plơi pla pơtrut tañ bruă pơpha prăk. Kơ-iăng Khua dêh čar ta rơkâo khua mua git gai hơdôm ding jum, ƀirô, plơi pla đing nao khut khăt črâo ba, pơtlaih hơdôm tơlơi gun, tơlơi tơnap, pơtrut mrô bruă hăng ngă sit nik./.

Siu H’ Prăk: Pơblang