VOV4.Jarai - Ƀơi Đà Nẵng, mơguah lơ 25/7, Ding kơna Ding jum kơđi čar, Kơ-iăng Khua dêh čar ta ơi Phạm Bình Minh hrom hăng grŭp hyu mă bruă nao tơña bla, brơi gơnam tap kơ Anom rông ba mơnuih djru ngă hơkrŭ đưm, ling tơhan rơka ruă ƀơi ƀôn prong Đà Nẵng, anih glăk rông ba, bơwih brơi 48 čô mơnuih djru ngă hơkrŭ đưm hăng sang anô̆ ling tơhan pơsăn drơi ƀu hmâo anih gơnang.

Kơ-iăng Khua dêh čar ta čơphin rup hăng ƀing ơi yă, ƀing amĭ glăk dưi bơwih brơi ƀơi Anom rông ba mơnuih djru ngă hơkrŭ đưm ƀôn prong Đà Nẵng

Kơ-iăng Khua dêh čar ta ơi Phạm Bình Minh tơña bla tơlơi suaih pral ƀing amĭ, ling tơhan rơka ruă; djă pioh hăng bơni hơdôm tơlơi gir run mơng Grŭp Khua mua, mơnuih mă bruă ƀơi anom hmâo abih pran jua bơwih brơi, rông ba mơnuih djru ngă hơkrŭ đưm. Kơ-iăng Khua dêh čar rơkâo Anom bơwih brơi dong, rông ba klă hơdôm mơnuih gah hơdră bruă gum djru glăk dô̆ hơdip ƀơi anai. Tơdơi kơ anun, Kơ-iăng Khua dêh čar ta ơi Phạm Bình Minh hrom hăng grŭp hyu mă bruă hmâo nao tơña bla, brơi gơnam tam sa dua bôh sang anô̆ gah hơdră gum djru ƀuh rơđah hloh./.

Siu H’ Prăk: Pơblang