Amăng rơwang nao čuă pơhmư̆ Jơnum gưl dlông kơ Tơlơi pơkôl prăk kak đơ đam rŏng lŏn tơnah phrâo hăng mă bruă ƀơi dêh čar Prang, lơ 21/6, Kơ-iăng Khua dêh čar ta ơi Trần Hồng Hà hmâo nao čuă anih mă bruă Ƀirô pơđĭ kyar Prang (AFD) hăng hmâo mông mă bruă hăng yă Marie Helene Loison, Kơ-iăng Khua AFD, hăng hơdôm ƀing khua mua gưl dlông mơng AFD.

Amăng mông mă bruă, Kơ-iăng Khua dêh čar ta pơdah pran jua mơ-ak ƀơi anăp hơdôm yak pơđĭ kyar klă amăng tơlơi rô nao rai Việt Nam hăng Prang, biă ñu amăng gum hrŏm bơwih ƀong, sa phun than yôm phăn tơlơi rô nao rai Gum hrŏm bruă dua bôh dêh čar. Dua bơnah tŭ ư kơtưn gum hrŏm hloh dong kơplah wah AFD hăng Việt Nam amăng bruă pơplih apui yua, biă ñu amăng mông dêh čar Việt Nam hmâo laih hơdôm tơlơi pơkôl kơtang tit amăng mông jơnum COP26 hăng pok pơhai bruă Gum hrŏm pơplih apui yua dưm kơnar; gum hrŏm pok pơhai ba glăi bôh tơhnal dong hơdôm rơwang bruă bơwih ƀong djru kơ pơđĭ kyar kơjăp phik ƀơi Việt Nam./.