VOV4.Jarai - Čơtlăm lơ 25/7, ƀơi Ƀirô mă bruă Kơnuk kơna, Kơ-iăng Khua dêh čar ơi Vũ Đức Đam, Khua Grŭp hyu mă bruă mrô 3 kơ pel ĕp, pơtrut pơsur, pơtlaih tơlơi tơnap, pơtrut kơtang bruă pơsir prăk tuh pơplai bruă hrom thun 2022 hmâo mă bruă laih hăng 17 ding jum, ƀirô Kơnuk kơna, 2 tơring čar Cao Bằng, Bắc Kạn kơ rơnoh pơsir prăk tuh pơplai bruă hrom. Yap truh lơ 30/5, mrô prăk pơsir hmâo mơng 17 ding jum gơnong bruă gah Grŭp hyu mă bruă mrô 3 năng ai ñu 1.585 klai prăk, dưm dưm hăng 8,77% kơčăo bruă hăng ƀiă hloh hơnong ñu pơkă hrom mơng đơ đam dêh čar. Yap truh lơ 22/7, tơring čar Cao Bằng pơsir hmâo rơbêh kơ 20%, tơring čar Bắc Kạn hmâo rơbêh kơ 22%. Bôh than bơdjơ̆ nao rơnoh bruă pơsir prăk tuh pơplai bruă hrom yua kơ pơplih hơdră pơkă, hơdră bruă ngă tui hră pơkôl man pơdŏng, rơwang bruă ODA; pơplih nua gơnam man pơdŏng, mơnuih mă bruă man pơdŏng... Klah čun mông jơnum, Kơ-iăng Khua dêh čar ta ơi Vũ Đức Đam rơkâo pơtrut pơsir dong prăk tuh pơplai bruă hrom, pơkă hlâo amra hmao tui rơnoh ba tơbiă amăng rơnuč thun; tơlơi pơmin khom hmâo prăk lĕ dưi pơsir. Hăng hơdôm rơwang bruă hơpă akă ngă giong hră pơ-ar lĕ tla glăi, hrom hăng anun lom tla lĕ hơdôm pô tuh pơplai hơdôm bôh ƀirô ăt khom pok pơhai dong, lom tum djop hră pơ-ar lĕ amra pơsit brơi./.

Siu H’ Prăk: Pơblang