VOV4.Jarai - Mơguah lơ 14/9, ƀơi plơi prong Nha Trang, Grŭp hyu mă bruă mơng Gong gai dêh čar ta yua kơ Kơ-iăng Khua dêh čar ta ơi Vũ Đức Đam ba jơlan hlâo hmâo mă bruă laih hăng Jơnum min mơnuih ƀôn sang tơring čar Khánh Hòa kơ hơdôm bruă mă phun mơng sa dua gơnong bruă bôh thâo – mơnuih mơnam.

Pơhiăp amăng mông mă bruă, Kơ-iăng Khua dêh čar ta ơi Vũ Đức Đam pơsit yôm bruă ngă tui bruă bôh thâo – mơnuih mơnam mơng tơring čar Khánh Hòa. Biă ñu amăng bruă pơgang pơgăn klin Covid-19. Kơ-iăng Khua dêh čar ta brơi thâo pơ̆ anăp anai, Ding jum ia jrao hmâo pơtô brơi tơhnal djơ̆, rơnoh pơkă kiăng tơring čar tuh pơplai pơdŏng anih anom mă yua Anom wai lăng tơlơi duam ruă. Hơdôm sang ia jrao gah tlôn mơng Ding jum djru tơring čar pơdŏng Sang ia jrao prong tơring čar. Gah tơlơi pơplih mrô, Gơnong bruă pơhing hăng pôr pơhing pơphô brơi kơ tơring čar ba tơbiă hơdôm jơlan gah sit nik, rơđah amăng pơdŏng gong gai điện tử, djru mơnuih ƀôn sang./.

Siu H’ Prăk: Pơblang