VOV4.Jarai - Mơguah lơ 7/4, Kơ-iăng Khua dêh čar ta ơi Vũ Đức Đam nao čuă hăng mă bruă ƀơi tơring čar Vĩnh Long kơ bruă Pơtô pơhrăm hăng bôh thâo, bơkơjăp drơi jăn hăng tuai čuă ngui. Jơnum min mơnuih ƀôn sang tơring čar Vĩnh Long hmâo lăi pơthâo glăi hăng Kơ-iăng Khua dêh čar bôh tơhnal ngă tui hơdôm bruă mă phun amăng bruă Bôh thâo, bơkơjăp drơi jăn hăng tuai čuă ngui hăng pơtô pơhrăm rơwang ră anai. Amăng anun pơsit, khă dô̆ lu tơlơi tơnap, samơ̆ tơring čar lăng ba pơđĭ kyar na nao bôh thâo, bơkơjăp drơi jăn hăng tuai čuă ngui pơhlôm djơ̆ nao hrom hăng tơhnal pơkă, kual pơkă pơđĭ kyar bơwih ƀong mơng tơring čar hăng amăng kual. Kơ-iăng Khua dêh čar čang rơmang Vĩnh Long hmâo dong hơdôm bruă kơtưn đĭ wai lăng bruă pơtô pơhrăm ƀơi tơring čar amăng anun nai pơtô, čơđai sang hră, ngăn rơnoh, sang hră anih hrăm. Pơsir phun tơlơi nai pơtô tui phiăn pơkă, hmâo keh prăk djru kơ čơđai sang hră tơnap./.

Siu H’ Prăk: Pơblang