VOV4.Jarai - Mơguah lơ 24/3, ƀơi Hà Nội, Kơ-iăng Khua dêh čar ta ơi Vũ Đức Đam nao jơnum hăng đĭ pơhiăp amăng mông jơnum abih bang Jơnum min hlăk ai Việt Nam tal Sa dêh čar ta. Pơhiăp amăng mông jơnum, Kơ-iăng Khua dêh čar ta ơi Vũ Đức Đam lăi rơđah: Ră anai, hlăk ai akă djop 18 thun hmâo laih tơlơi thâo hluh gah mơnuih mơnam, gah lu bruă mă hloh kơ rơnuk nao hlâo. Anai lĕ sa amăng hơdôm tơlơi lông ba tơbiă kơ Jơnum min hlăk ai Việt Nam.

Kơ-iăng Khua dêh čar ta ơi Vũ Đức Đam rơkâo, hơdôm hrơi pơ̆ anăp Jơnum min hăng Khul hlăk ai dêh čar ta kiăng thâo rơđah, pơdŏng hơdôm jơlan hơdră ngă kiăng dưi ngă tui pran pơčeh phrâo mơng hlăk ai Việt Nam rơnuk phrâo. Lăi rơđah tơlơi đing nao mơng Gong gai dêh čar hăng Khua dêh čar hăng hlăk ai Việt Nam hăng bruă mă hlăk ai, Kơ-iăng Khua dêh čar ta ơi Vũ Đức Đam rơkâo hơdôm ding jum, gơnong bruă bơdjơ̆ nao khom gum hrom kơjăp hăng Jơnum min hlăk ai Việt Nam hăng Khul hlăk ai dêh čar pok pơhai hơdôm jơlan hơdră rơđah rơđông, tui djơ̆ pran jua mơng Gong gai dêh čar./.

Siu H’ Prăk: Pơblang