Ƀơi hơdôm plơi pla djuai ania Chăm dŏ hơdip 100% mrô să đĭ plơi pla phrâo, hơmâo jơlan rơdêh ôtô mut nao amăng lăm, 100% kual mơnuih djuai ania Chăm hơmâo apui lơtrik, sang ia jrao, sang gru grua să, hơmâo sang hră. Prăk pơhrui mơng mơnuih djuai ania Chăm lu ƀiă hăng mrô sang anŏ ƀun rin ăt hrŏ trun ƀiă pơhmu hăng mrô bơkơnar đơ đam tơring čar Ninh Thuận.

Amăng mông bưp, Kơ-iăng khua dêh čar Trần Lưu Quang čang rơmang ƀing ơi phơ̆t yă yơng tŏ tui ba jơlan hlâo amăng bruă pơtrut pơsur ƀing mơnuih tui đăo ngă tui hơdră bruă mơng Ping gah, kơnuk kơna amăng djă pioh, lăi pơthâo gru grua yôm phara, pơgôp ngă hiam tui gru grua djop djuai ania Việt Nam. Kơ-iăng khua dêh čar lăng tơlơi gum pơgôp mơng djop djuai ania mơng hơdôm tơring đăo mơng djuai ania Chăm ƀơi Ninh Thuận lĕ tơlơi gum pơgôp yôm phăn amăng pơđĭ kyar plơi pla, lŏn ia.