VOV4.Jarai - “Hơdôm ding jum, ƀirô dêh čar ta khom hmâo jơlan pơsir khop kiăng pơtrut pơsir prăk mă yua kơ bruă hrom, hơkrŭ pơsir tơlơi sa rơwang bruă akă prăp lui tŏng hră pơ-ar lom tuh pơ plai”. Anai lĕ tơlơi rơkâo mơng Kơiăng Khua dêh čar ta ơi Vũ Đức Đam, Khua grŭp hyu mă bruă mrô 3 amăng mông jơnum pel ĕp, pơtrut, pơtlaih tơnap, pơtrut kơtang pơsir prăk mă yua kơ bruă hrom thun 2022 lom mă bruă hăng hơdôm Ding jum, gơnong bruă, ƀirô kơnuk kơna pơphun amăng lơ 17/5 ƀơi Hà Nội. Tui hăng tơlơi lăi pơthâo glăi mơng Ding jum Kơčăo bruă hăng tuh pơplai dêh čar, anom wai lăng kơčăo bruă tuh pơplai ngăn drăp Kơnuk kơna thun 2022 dưi jao kơ hơdôm ding jum, ƀirô kơnuk kơna gah Grŭp hyu mă bruă mrô 3 lĕ 12.019 klai prăk. Yap truh abih blan 5, hơdôm Ding jum, ƀirô kơnuk kơna him lăng pơsir năng ai ñu 464 klai prăk, hmâo 3,86% kơčăo bruă thun 2022, ƀiă hloh rơnoh hơnong ñu đơ đam dêh čar lĕ 20,27%, amăng anun hmâo 13 boh anom pơkă lăng hlâo pơsir ƀiă biă yŭ kơ 10%. Khua hơdôm Ding jum, ƀirô kơnuk kơna lăi lĕ: kiăng pơtrut pơsir prăk tuh pơplai, khom pel ĕp dong, ngă giong hơdôm hơdră pơkă, hơdră bruă tơlơi phiăn kơ tuh pơplai bruă hrom, lŏn dron, pơdŏng hăng tơlơi phiăn hmâo bơdjơ̆ nao tui jơlan gah pơpha gưl, ngă amuñ hĭ hră pơ-ar tuh pơplai, pơsir prăk kiăng pơtlaih tơnap, tơlơi gun, pơtrut pơsir prăk tuh pơplai bruă hrom./.

Siu H’ Prăk: Pơblang