VOV4.Jarai-Ăt dŏ mơak amăng akŏ thun phrâo, tlam lơ 7/2, nao čuă hăng pơpŭ thun phrâo amăng mông mă bruă hăng khua mua Jơnum min Djuai ania, ding kơna ding jum kơđi čar, Kơ-iăng Khua git gai pơ ala mơnuih ƀôn sang dêh čar ơi Trần Thanh Mẫn pơtă pơtăn kơ Jơnum min Djuai ania pơtum čih pơkra tơlơi phiăn gah bruă Djuai ƀiă kiăng pơblih pơkra djop bruă mă wai lăng djop djuai ania ƀiă dêh čar. Kơ-iăng Khua git gai pơ ala mơnuih ƀôn sang dêh čar, ơi Trần Thanh Mẫn lăi, lăng nao abih bang tơlơi hơdip amăng mơnuih ƀôn sang dêh čar, tơlơi hơdip mơda mơnuih djuai ƀiă ăt dŏ tơnap tap hloh.

Pơ anăp anai, Jơnum min Djuai ania pơtum pơsir hĭ tơlơi tơnap amăng bruă čih pơkra tơlơi phiăn, jơlan hơdră pơtrun mơ̆ng kơnuk kơna; ngă tui djơ̆ bruă krăo lăng ngă djơ̆ tơlơi phiăn kơnuk kơna, ngă tui hră pơtrun mơ̆ng khua mua pơ ala mơnuih ƀôn sang dêh čar, mơ̆ng kơnuk kơna pơtrun, kiăng bruă mă pioh kơ mơnuih djuai ƀiă amăng dêh čar dưi tŭ mă tơlơi djru lăp djơ̆ mơ̆ng lu jơlan hơdră, laih dơ̆ng pơđĭ tui tơlơi gêh găl mơ̆ng rĭm kual hăng pơtrut pran jua mơnuih ƀôn sang djop djuai ania hrưn đĭ pơđĭ kyar, hơđong kjăp amăng kual mơnuih djuai ƀiă hăng kual čư̆ siăng.

Nay Jek: Pơblang