VOV4.Jarai - Mơguah lơ 11/9, Ding kơna Ding jum kơđi čar, Kơ-iăng Khua git gai wai lăng pơ ala mơnuih ƀôn sang dêh čar ta ơi Trần Thanh Mẫn hmâo git gai laih bruă jơnum Grŭp lăng tui mơng Khua pơ ala mơnuih ƀôn sang dêh čar kơ pơplih phrâo jơlan hơdră, hơdrôm hră hrăm. Hơdôm tơlơi gum pơhiăp bơkơtuai amăng mông jơnum rơkâo, tâ̆o hloh pơhrua nao jơlan gah hyu hơduah tơña tơlơi gum pơhiăp mơnuih ƀôn sang, kiăng thâo, kơsem min, pơsit tơlơi gum pơhiăp mơng amĭ ama čơđai sang hră pioh ngă tui hơdôm Tơlơi pơtrun pơsit mơng Khua pơ ala mơnuih ƀôn sang kơ pơplih phrâo jơlan hơdră, hơdrôm hră hrăm. Ơi Trần Thanh Mẫn lăi rơđah, tơlơi rơkâo hmâo ba tơbiă hăng akô̆ bruă lăng tui lĕ pơsit bruă črâo ba hăng pok pơhai pơphun ngă tui mơng Kơnuk kơna, Gơnong bruă, Jơnum min mơnuih ƀôn sang hơdôm bôh tơring čar, ƀôn prong; ngă rơđah hơdôm bôh tơhnal dưi ngă, hơdôm tơlơi gun, akă gal hăng bôh than ba truh, bruă gơgrong mơng ƀirô wai lăng kơnuk kơna, hơdôm ding jum, gơnong bruă hăng hơdôm bôh tơring čar, ƀôn prong. Mơng anun, ba tơbiă hơdôm jơlan gah pơsir, rơkâo đĭ ngă giong hơdôm hră pơ-ar pơkă tơlơi phiăn hmâo bơdjơ̆ nao kiăng pok pơhai ngă tui ba glăi bôh tơhnal dong hơdôm tơlơi pơtrun pơsit mơng Khua pơ ala mơnuih ƀôn sang kơ pơplih phrâo jơlan hơdră, hơdrôm hră hrăm amăng rơwang pơ̆ anap./.

Siu H’ Prăk: Pơblang