Pơhiăp amăng tal jơnum, Kơ-iăng Khua git gai wai lăng pơ ala mơnuih ƀôn sang dêh čar ta ơi Trần Quang Phương lăi rơđah, Khua pơ ala mơnuih ƀôn sang dêh čar ta hmâo hluai tui Tơlơi pơtrun pơsit kơ pơphun gong gai ƀôn prong hăng pơphô hlâo sa dua hơdră pơkă, hơdră bruă phara pơđĭ kyar ƀôn prong Đà Nẵng. Tơlơi pơtrun pơsit anai hmâo bôh tŭ yua yôm phăn biă, pơjing bruă phiăn tŭ yua pioh Đà Nẵng ngă tui tơhnal gal, anô̆ gal, pơplih gah bơwih ƀong – mơnuih mơnam, pơplih phrâo hơdôm tơlơi pơmin, tơhnal pơkă amăng Tơlơi pơtrun pơsit mrô 43 mơ̆ng Ding jum kơđi čar kơ pơdŏng hăng pơđĭ kyar ƀôn prong Đà Nẵng truh thun 2030, tơhnal lăng nao truh thun 2045.

Kơ-iăng Khua git gai wai lăng pơ ala mơnuih ƀôn sang dêh čar ta ơi Trần Quang Phương pơtă, bruă pơphun ngă tui Tơlơi pơtrun pơsit hăng rơwang hơdră bruă prong ƀiă, hăng lu bruă ăt ba tơbiă mơn hơdôm tơlơi lông prong kơ ƀôn prong, biă ñu hăng Khul khua pơ ala mơnuih ƀôn sang ƀôn prong gah anô̆ kơjăp mă yua hră pơ-ar ăt kah hăng rơnoh bruă pơdŏng. Gah hơdră bruă pơphô hlâo pơjing kual sĭ mơdrô hơdơ̆ či hor ƀơi Đà Nẵng, Kơ-iăng Khua git gai wai lăng pơ ala mơnuih ƀôn sang dêh čar ta ơi Trần Quang Phương lăi rơđah kiăng ngă tui tañ hăng mă yua khom dưi tơlơi pơtrun pơsit mrô 43 rơkâo Khul khua pơ ala mơnuih ƀôn sang, hơdôm Grŭp Khul khua pơ ala mơnuih ƀôn sang khom gum hrŏm ngă bruă tañ./.