Tui hăng tơlơi lăi pơthâo glăi amăng mông jơnum, amăng thun anai, bruă jơnum ƀơi Daklak hmâo lu gru rơđah. Bruă pơsur abih bang mơnuih ƀôn sang gum hrom dŏng yua pơgang, pơgăn klin Covid-19 dưi đing nao dong. Jơnum min djop djuai ania mơnuih mơnam Việt Nam tơring čar hmâo tŭ mă laih rơbêh kơ 6 klai 800 klăk prăk hăng pơpha kơ hơdôm ƀirô, anom bruă hơdôm gưl kiăng djru gum hrom ngă tui pơgang pơgăn klin ăt kah hăng ba prăk blơi vaccine kơ dêh čar. Amăng blan ngă tui lu hloh yua kơ mơnuih ƀun rin thun anai, hơdôm bôh tơring glông, plơi prong hmâo rơkâo laih pơsur hmâo giăm truh 14 klai prăk.

Mơng prăk anai hmâo pơpha hyu, pơsir prăk djru pơdŏng, pơkra glăi sang dô̆ gum hrom hơbit, djru mơnuih ƀôn sang blơi gơnam ngă đang hmua, ƀơk gơnam Tết, pơjrao tơlơi duam ruă kơ mơnuih ƀun rin... Amăng mông jơnum, ƀing khua pơ ala hmâo lăi pơthâo nao rai, ngă rơđah hơdôm bôh yôm bơdjơ̆ nao bruă bơkơtuai mơnuih ƀôn sang; mă yua bôh thâo phrâo amăng wai lăng, git gai hăng lăi pơhing mơng Jơnum min. Daklak ăt lăi pơthâo mơn hơdră ngă tŭ yua amăng gum hrom hơbit tum pơƀut hơdôm gưl mơnuih ƀôn sang, djop djuai ania, khul đăo gum hrom pơdŏng pran gum hrom hơbit. Rơkâo đĭ sa dua bôh yôm bơdjơ̆ nao hơdôm tơlơi tơnap, bơrơkua lom pok pơhai, ngă tui hơdôm hră pơ-ar tơlơi phiăn, tơlơi pơtrun pơsit, tơlơi pơtrun pơkă...