VOV4.Jarai - Hăng rơbêh 10 thun mut hrŏm amăng bruă Khul, amai Nông Thị Lành - Kơ-iăng Khua khul đah kơmơi plơi Ograng (să ia Pếch, tơring glông Ia Grai, tơring čar Gia Lai) hơmâo lu tơlơi gum pơgôp amăng bruă ƀơi ƀon lan. Sit biă ñu, hăng pran thâo djru tơdruă ñu pơtrut pơsur mơnuih ƀon sang amăng plơi pla, gum hrŏm djru brơi hơdôm sang anŏ ƀun rin, sang anŏ tơnap tap.

Klin Covid-19 lar hyu amăng plơi Ograng ngă kơ lu sang anŏ ƀun rin jai tơnap tap tui. Yă Phạm Thị Lam lĕ sa amăng hơdôm sang anŏ tui anun lơ̆m sang anŏ ñu hơmâo mơnuih pơčlah pơƀut, tơlơi anai ngă kơƀah mơnuih mă bruă hăng rơngiă prăk duh pơkŏn dong. Yă Lam brơi thâo, lơ̆m tơlơi hơdip tơnap tap, sang anŏ ñu hơmâo tơlơi gum djru hmao tlôn mơng amai Nông Thị Lành:

“Rơkơi kâo dju djuam duam ră, ană bă nao mă bruă pơ ataih lơ̆m glăi pơ plơi pla khŏm pơčlah pơƀut yua anun tơlơi hơdip tơnap tap biă, sang anŏ rin rơpa dong, mơ̆ khŏm duh arăng 1 klăk 600 rơbâo. Yua anun kâo pơtă ană bă kiăng kơ lăi pơthâo brơi arăng truh pơčlah giong sang anŏ kah mơng hơmâo prăk duh. Yua kơ hơmâo neh Lành djru brơi sang anŏ kah mơng hơmâo prăk”.

Amai Nông Thị Lành (ao jŭ) nao čuă hăng pơ alum pran jua sang anŏ amai Tạ Thị Hồng Hạnh lĕ sang anŏ tơnap tap

Ƀu djơ̆ kơnong djru brơi ƀing ding kơna đah kơmơi amăng khul đah kơmơi plơi Ograng, amai Nông Thị Lành ăt hrŏm hăng adơi amai amăng khul pok prong bruă gum djru brơi ƀing adơi amai tơnap tap ƀơi hơdôm plơi pla iêo gah. Amăng mrô anun hơmâo sang anŏ amai Tạ Thị Hồng Hạnh dŏ ƀơi plơi Sát Tâu, să Ia Pếch. Yua kơ ƀuh sang anŏ amai Hạnh rin rơpa đơi, laih dong glăk dŏ pơjrao brơi rơkơi ñu ruă kă dong, amai Nông Thị Lành hơmâo jak iâu mơnuih gum pơgôp rơbêh 4 klăk prăk djru brơi sang anŏ amai Hạnh kiăng kơ plai ƀiă glêh tơnap. Lơ̆m rơkơi ñu djai yua ruă kraih, amai Lành djru brơi amăng hrơi mơyut jôk, juăt nao tơña bla, pơ alum pran jua amai Hạnh găn rơgao tơnap tap.

“Lơ̆m bưp tơnap tap amai Lành ăt blơi brơi mitôm, sa, dua gơnam yua pơkŏn kiăng pơ alum pran jua, ƀơi să hơmâo hơdră djru hơget thơ, ñu lêng kơ lăng ba sang anŏ gơmơi, jak iâu ană plơi pla djru brơi sang anŏ gơmơi sum ao, mitôm, braih. Amai Lành djru brơi lu biă mă. Kâo bơni kơ ñu lu lin, lơ̆m bưp tơnap tap Khul đah kơmơi hăng să juăt rai tơña bla”.

Hăng rơdêh thut sô hơđăp, amai Nông Thị lành đuăi hyu djop ară jơlan kiăng kơ djru brơi ƀing čơđai anet, mơnuih tha rơma sang anŏ tơnap tap. Gah tlôn kơ pran hur har amăng bruă mă, lu mơnuih ăt aka ƀu thâo amai Nông Thị Lành glăk pơjrao tơlơi ruă kă amăng drơi jăn, hăng lu wŏt ba nao pơčrang. Mah drơi jăn ruă kă, samơ̆ amai Lành lêng kơ hơdip mơ-ak, djru brơi ƀing mơnuih tơnap tap.

“Čang rơmang mơnuih ƀon sang lêng kơ dong yua bruă mă mơng kâo pô. Ăt čang rơmang klin kheng amra pơgang hĭ abih kiăng kơ neh met wa dưi hơdip tui hơđăp. Kâo ăt čang rơmang kâo pô suaih pral na nao, abih bang mơnuih lêng suaih pral, hăng hơmâo lu dong ƀing mơnuih čơmah dong yua bruă mă mơng kâo pô lơ̆m jak iâu gum pơgôp djru brơi hơdôm sang anŏ tơnap tap hăng hơmâo lu dong prăk kak djru brơi neh met wa”.

Amai Lành pơtrut pơsur ƀing mơnuih čơmah ƀơk gơnam brơi ƀing mơnuih glăk pơčlah pơƀut ƀơi ƀon lan

Tui hăng Jơnum min mơnuih ƀon sang să Ia Pếch, amăng thun 2021, amai Nông Thị Lành hơmâo gum hrŏm hăng djop anih anom, khul grup ƀơk brơi hơdôm rơtuh gơnam anun lĕ gơnam yua, hră čih brơi hơdôm sang anŏ, ƀing čơđai hrăm amăng să sang anŏ tơnap tap, ƀing čơđai drit druai …Yă Phạm Thị Kim Tuyến, kơ-iăng khua Jơnum min mơnuih ƀon sang să Ia Pếch brơi thâo: Amai Nông Thị Lành lĕ mơnuih apăn bruă thâo rơgơi amăng djop mơta. Tơlơi yôm hloh mơng amai Lành lĕ lêng abih pran jua amăng bruă mă, jê̆ giăm hăng ană plơi pla.

“Hăng pran gơgrong mơng ñu pô amăng plơi pla, rơngiao kơ bruă pơtô pơblang pơtrut pơsur, djru brơi bruă tlâ̆o ia jrao, lơ̆m ƀuh bruă pơčlah pơƀut kơ neh met wa glêh tơnap đơi ñu jak iâu gum djru. Gah să lăng yôm, hơmâo lu wŏt pơpŭ bơni, pơtrut pran jua amai Nông Thị Lành. Kơnong amai Nông Thị Lành ăt lĕ mơnuih ba gru amăng pơtô pơblang brơi abih bang mơnuih ƀon sang  hăng pran gơgrong amăng bruă pơgang klin, sit biă ñu amăng bruă gum djru ană plơi pla, hrŏm hăng gong gai ƀon lan, djop gơnong bruă, ba jơlan hlâo amăng djop bruă amăng plơi pla. Ñu hur har pran jua hăng hơmâo lu gơnong bruă rơkâo pơpŭ bơni”.

Hăng hơdôm tơlơi dưi ngă anun, amăng hơdôm thun laih rơgao, amai Nông Thị Lành hơmâo djop gưl gong gai hăng khul grup jao hră pơpŭ bơni. Hăng pran jua hơdip mơ-ak, jê̆ giăm hăng biă mă ñu thâo khăp pap, djru tơdruă, yua anun amai Nông Thị Lành lêng hơmâo lu mơnuih kiăng khăp ƀu-eng.

Siu Đoan: Pơblang