VOV4.Jarai - Anăp nao Hơdor glăi 75 thun Hrơi pioh kơ Ling tơhan rơka ruă hăng pơsăn drơi yua kơ lŏn ia (27/7/1947 – 27/7/2022), mơguah lơ 10/6, ƀơi Anih mă bruă Khua mir sir, Kơ-iăng Khua mir sir dêh čar ta yă Võ Thị Ánh Xuân tŭ jum grŭp mơnuih pơ ala kơ mơnuih djru ngă hơkrŭ đưm tơring čar Daknông ƀrô djơ̆ tal grŭp nao čuă plơi prong jưh jom Hà Nội hăng nao čuă pơsăt jep Wa Hồ. Ră anai tơring čar Daknông hmâo rơbêh kơ 13 rơbâo čô mơnuih gah hơdră bruă gum djru, amăng anun hmâo čơkă mă prăk rim blan lĕ giăm truh 3 rơbâo čô mơnuih.

Kơ-iăng Khua mir sir dêh čar ta yă Võ Thị Ánh Xuân ƀơk gơnam djă pioh kơ mơnuih djru ngă hơkrŭ đưm tơring čar Daknông

Hrom hăng hơdră bruă gum djru mơng Ping gah hăng Kơnuk kơna, bruă abih bang mơnuih ƀôn sang bơwih brơi kơ ling tơhan rơka ruă, sang anô̆ hmâo ling tơhan pơsăn drơi hăng mơnuih djru ngă hơkrŭ đưm mơng tơring čar hmâo laih lu bôh tơhnal, dưi ngă tui pran kơtang abih bang mơnuih ƀôn sang gum hrom. Gah phun ñu, tơlơi hơdip mơng mơnuih gah hơdră bruă gum djru ƀơi tơring čar hơđong ƀiă mơn. Ră ruai hăng grŭp mơnuih mơbruă lĕ mơnuih djru ngă hơkrŭ đưm tơring čar Daknông, Kơ-iăng Khua mir sir dêh čar ta yă Võ Thị Ánh Xuân pơdah pran jua hơdor tơngiă hăng mơnuih djru ngă hơkrŭ đưm mơng tơring čar Daknông, čang rơmang tơring čar ngă tui gru grua gum hrom hơbit, khăp kơ lŏn ia mơng neh wa djop djuai ania Dăp Kơdư gum tơngan hrom pơdŏng plơi pla sit nik klă bruă pơdŏng hăng pơgang lŏn ia, hrom hăng anun lăng ba ngă tui klă dong hơdră bruă gum djru kơ mơnuih ngă hơkrŭ đưm, kiăng pơtô juăt pran jua khăp kơ lŏn ia, phiăn juăt mơng djuai ania pioh kơ mơnuih mơnam./.

Siu H’ Prăk: Pơblang