VOV4.Jarai - Kơ-iăng Khua mir sir dêh čar ta yă Võ Thị Ánh Xuân hmâo nao pơpŭ bơnga, tuĭ ñang hơdor glăi Khua mir sir Hồ Chí Minh ƀơi Kual djă pioh gru grua đưm lŏn ia pha ra Kim Liên, tơring glông Nam Đàn, tơring čar Nghệ An. Amăng tơlơi pơpŭ, Kơ-iăng Khua mir sir dêh čar ta yă Võ Thị Ánh Xuân hrom hăng grŭp hmâo pơpŭ bơnga, tuĭ ñang, hơdor glăi, pơdah pran jua pơpŭ, thâo tơngia prong prin hăng Khua mir sir Hồ Chí Minh – Khua git gai krên dên mơng Ping gah hăng mơnuih ƀôn sang ta, khin hơtai tlaih rơngai djuai ania, pô thâo rơgơi hloh, Ñu hmâo tuh tơyuh laih pran jua ñu kơ bruă tlaih rơngai djuai ania, tlaih rơngai hơdôm gưl, yua kơ tơlơi rơnuk rơnua hăng yâu mơ-ak mơng djuai ania Việt Nam hăng mơnuih ƀôn sang ƀơi rŏng lŏn tơnah. Čih pioh amăng hră yôm phăn hơdor glăi ƀơi Kual djă pioh gru grua Kim Liên, Kơ-iăng Khua mir sir dêh čar ta yă Võ Thị Ánh Xuân čih: “Pơpŭ hăng hơdor kơ Wa, ƀing gơmơi ƀuăn hrăm tui na nao tơlơi pơmin, pran jua, kơnuih Hồ Chí Minh; pơsit pran hrom, ha pran jua pơdŏng Ping gah ta klă hiam, kơjăp kơtang, djru pơdŏng lŏn ia jai hrơi jai klă hiăm, rơgơi kơhnâu; Mơnuih ƀôn sang ta yâu mơ-ak”./.

Siu H’ Prăk: Pơblang