VOV4.Jarai - Hmư̆ tui tơlơi jak iâu mơng Kơ-iăng Khua mir sir dêh čar ta yă Võ Thị Ánh Xuân, ơi Bounthong Chitmany, Ding kơna Ding jum kơđi čar, Grŭp git gai Ping gah dêh čar Lao, Kơ-iăng Khua mir sir dêh čar Lao rai čuă sit nik dêh čar Việt Nam mơng lơ 17-19/7/2022. Čơtlăm lơ 17/7, tơdơi kơ čơkă jum, Kơ-iăng Khua mir sir dêh čar ta yă Võ Thị Ánh Xuân hmâo bơkơtuai laih hăng ơi Bounthong Chitmany ƀơi Anih mă bruă Khua mir sir.

Kơ-iăng Khua mir sir dêh čar ta yă Võ Thị Ánh Xuân hăng ơi Bounthong Chitmany

Bơkơtuai kơ jơlan gah pơsit pơtrut gum hrom dua bơnah pơ̆ anăp anai, dua gơñu hmâo tŭ ư djă pioh dong hơdôm tal čuă nao rai, bưp gưl dlông amăng abih bang hơdôm glông bruă; pơphun klă hơdôm bruă mă tŭ yua hăng sit nik amăng Thun gum hrom hơbit giăng mah Việt Nam hăng Lao, Lao hăng Việt Nam thun 2022; gum hrom pok pơhai tơpă hăng ba glăi bôh tơhnal hơdôm tơlơi pơkôl gưl dlông. Dua bơnah pơsit gir run gum hrom dong hăng hơdôm bôh dêh čar ding kơna ƀu pơdơi hơkrŭ đĭ pran gum hrom hơbit, pơlir hơbit hăng bruă mă phun mơng ASEAN, djă kơjăp hơdôm tơlơi pơkă, nua yôm, tơlơi pơmin hrom kơ hơdôm tơlơi bơdjơ̆ nao ƀơi anăp truh rơnuk rơnua, hơđong amăng kual; hmâo ha sa tơlơi pơmin pơsir hơdôm tơlơi amăng kual hăng ƀơi rŏng lŏn tơnah hăng jơlan rơnuk rơnua pơpŭ tơlơi phiăn jar kơmar./.

Siu H’ Prăk: Pơblang