VOV4.Jarai - Mơguah lơ 23/8, ƀơi Hà Nội, Kơ-iăng khua mir sir Võ Thị Ánh Xuân, Khua khul pơgang ba Keh prăk djru čơđai Việt Nam hơmâo nao čuă, ƀơk gơnam kơ ƀing čơđai brač tơƀuai tlao ƀơi Sang ia jrao Việt Nam - Cu Ba. Mơng thun 1997, Keh prăk djru čơđai Việt Nam hơmâo pơphun Jơlan hơdră “Yua kơ tơlơi tlao hiam mơng ƀing čơđai” djru prăk brač brơi ƀing čơđai ƀah ƀuai ƀơi Việt Nam. Tơdơi kơ 25 thun djru ba, yap truh ră anai hơmâo rơbêh 30 rơbâo čô čơđai amăng dêh čar dưi pơkra glăi tơƀuai. Thun anai, him lăng amra djru brač brơi dong kơ 2 rơbâo čô čơđai ƀơi hơdôm boh tơring čar gah Kơdư, Tong krah, Dap Kơdư hăng Dơnung. Him lăng tal anai, ƀơi sang ia jrao Việt Nam - Cu Ba Anom bruă Operation Smile amra djru brač brơi čơđai ƀah tơƀuai, ƀah amăng bah, bluh asar ƀơi ƀô̆ adung mơta kơ 800 čô čơđai gah tơring čar kual Kơdư. Prăk brač pơjrao, ƀong huă, anih đih pơdơi, nao rai mơng ƀing čơđai amra hơmâo djru brơi abih tih mơtăm.

Siu H’Mai: Pơblang