VOV4.Jarai - Amăng hơdôm hrơi nao čuă hăng jơnum khua mua đah kơmơi rŏng lŏn tơnah thun 2022 (GSW 2022) ƀơi Thái Lan, Kơ-iăng khua mir sir yă Võ Thị Ánh Xuân hơmâo nao čuă hăng mă bruă ƀơi tơring čar Udon Thani, bưp ƀing mơnuih ƀon sang dêh čar ta glăk dŏ hơdip ƀơi Thái Lan hăng nao čuă Trường Khánh An. Amăng mông bưp, tơdơi kơ hmư̆ lăi pơthâo kơ tơlơi hơdip mơng neh met wa dêh čar ta ƀơi Thái Lan, Kơ-iăng Khua mir sir yă Võ Thị Ánh Xuân ol kơdol lơ̆m bưp neh met wa, lăng yôm pran gum pơgôp, djru nao rai mơng neh met wa glăk dŏ hơdip ƀơi anai, pran pơlir hơbit, anăp nap plơi pla, lŏn ia. Kơ-iăng Khua mir sir yă Võ Thị Ánh Xuân ăt lăi pơthâo bruă amăng lŏn ia ta hăng hơdôm tơlơi hok mơ-ak, glăk ƀơƀrư̆ hơkrŭ glăi bơwih ƀong huă tơdơi kơ abih klin Covid-19; pơsit tong Ping gah hăng Kơnuk kơna lêng kơ đing nao biă mă mơnuih ƀon sang Việt Nam glăk dŏ hơdip pơ tač rơngiao lăi hrŏm hăng mơnuih ƀon sang glăi hơdip ƀơi Thái Lan lăi phara; čang rơmang Khul apăn bruă Khul mơnuih Việt Nam ƀơi Thái Lan hăng Khul apăn bruă hơdôm grup mơnuih ƀon sang Thái djuai Việt Nam amra jai hrơi jing mơnuih ngă kŏ, thâo gum pơgôp djơ̆ hăng tơlơi kiăng mơng neh met wa amăng bruă mut hrŏm, pơƀut glăi neh met wa, pơtô hrăm hrơi tơlơi yuan, hơdip anăp nao plơi pla ala ƀon.

Siu Đoan: Pơblang