VOV4.Jarai-Tlam mơmŏt lơ 8/9, Kơ-iăng Khua mir sir, Khua khul Keh prăk Pơgang ba čơđai muai Việt Nam yă Võ Thị Ánh Xuân hrom hăng Grup hyu mă bruă mơ̆ng Gơnong dlông hơmâo nao ngui hrom amăng mlam ngui ngor čơkă blan bơrơmi ria hăng ƀơk gơnam kơ čơđai sang hră đôm lăm kơnuk kơna čem rông djuai ƀiă tơring glông Văn Yên, tơring čar Yên Bái hrom hăng hơdôm čô čơđai ngă pô pơ ala kơ čơđai tơnap tap, ƀu klă drơi jăn amăng tơring glông nao jơnum mơak čơkă blan bơrơmi ria kah hăng hyu ngui, ĕp lăng anih anom pơphun mơak gru grua čơđai muai, lăng suang rup ania čơgrai, rơmung dul….

Kơ-iăng Khua mir sir yă Võ Thị Ánh Xuân hăng khua mua tơring čar Yên Bái

nao ƀơk gơnam kơ čơđai muai

Ƀrô djơ̆ tal anai, Kơ-iăng Khua mir sir yă Võ Thị Ánh Xuân hơmâo brơi 400 klăk prăk kơ ƀing čơđai muai tơnap tap ƀơi tơring čar Yên Bái; ƀơk 20 anung prăk hrăm hră kơ čơđai sang hră đôm lăm gưl dua tơring glông Văn Yên. Keh prăk Pơgang hăng djru čơđai muai Việt Nam hơmâo ƀơk 100 anung prăk hrăm hră hrom hăng 30 boh rơdêh dang rơwang kơ sang hră anai.

Kơ-iăng Khua mir sir yă Võ Thị Ánh Xuân ngui mơak hrom ƀing čơđai muai anet

Khul wai lăng mơnuih ƀu klă drơi jăn hăng čơđai muai drit druai Việt Nam ƀơk gơnam kơ 50 čô čơđai sang hră. Keh prăk anai djru kơ čơđai muai tơring čar ăt jao brơi 20 anung gơnam kơ čơđai sang hră tơnap tap, ƀu klă drơi jăn amăng tơring glông.

Nay Jek: Pơblang