VOV4.Jarai - Lơ 18/8, Ding kơna apăn bruă Ping gah, Kơ-iăng khua mir sir yă Võ Thị Ánh Xuân hrŏm hăng grup khua mua hơmâo nao čuă, ngă bruă ƀơi Puih kơđông tơhan pơgang guai Srêpok, Jơnum min mơnuih ƀon sang tơring glông Buôn Đôn hăng Trung đoàn tơhan cảnh sát cơ động Dap Kơdư, lêng dŏ ƀơi Dak Lăk. Nao čuă lăng, pel ĕp, juh alum pran jua tơhan pơgang guai Srêpôk, Kơ-iăng khua mir sir yă Võ Thị Ánh Xuân bơni hăng lăng yôm biă mă pran jua gum pơgôp, găn rơgao tơnap tap mơng ƀing khua, ling tơhan pơgang guai ƀơi Dak Lăk, tơring čar hơmâo anih dŏng yôm amăng bruă wai lăng rơnuk  rơnua yôm pơphăn mơng kual Dap Kơdư hăng amăng dêh čar ta.

Ngă bruă hăng ƀing khua tơring glông Buôn Đôn, Kơ-iăng khua mir sir pơtă pơtăn, mrô sang anŏ rin ƀơi tơring glông dŏ lu biă, hơmâo rơbêh 37%. Anai jing tơlơi ngă tơnap hăng tơring čar amăng bruă djru lăng ba tơlơi hơdip mơda mơnuih ƀon sang, pơđĭ kyar hơđong kơjăp...Kơ-iăng khua mir sir kiăng tơring glông Buôn Đôn lăi hơjăn hăng Dak Lăk lăi hrŏm lăng ba hloh dong bruă pơhrŏ trun mrô mơnuih rin ƀun kiăo tui tơlơi gêh gal mơng tơring glông.

Siu H’Mai: Pơblang