VOV4.Jarai - Tlam lơ 1/4, Kơ-iăng Khua mir sir yă Võ Thị Ánh Xuân nao čuă hăng mă bruă hăng ling tơhan ƀơi Puih tơhan wai pơgang guai Gành Dầu ƀơi plơi Gành Dầu, să Gành Dầu, plơi prong Phú Quốc, tơring čar Kiên Giang. Puih tơhan wai pơgang guai Gành Dầu wau lăng kual ia rơsĭ glông 33 km. Amăng kual ia rơsĭ wai lăng hơmâo 3 bul pơtâo lĕ bul pơtâo Hòn Bàng, Hòn Thầy Bói, Hòn Móng Tay.

Kơ-iăng khua mir sir yă Võ Thị Ánh Xuân mă bruă ƀơi Puih tơhan wai pơgang guai Gành Dầu

Amăng thun 2021, puih tơhan wai pơgang guai Gành Dầu hơmâo găn rơgao tơnap tap kiăng pơgiong bruă jao ha amăng plĕ, pơgang klin rah, pơgăn ƀing ngă soh rah, pơtrut pơsur mơnuih hyu mă akan hơdang amăng kual ia rơsĭ ngă tui djơ̆ tơlơi pơkă amăng tơlơi phiăn, pơhlôm hơđong amăng kual ia rơsĭ…Kơ-iăng Khua mir sir lăng yôm hăng pơpŭ bơni pran gum pơgôp, găn rơgao tơnap tap pơgiong bruă jao mơng ƀing apăn bruă, ling tơhan ƀơi Puih tơhan wah pơgang guai Gành Dầu. Laih dong rơkâo anom bruă kiăng đing nao bruă pơjing Ping gah kiăng kơ ngă klă amăng bruă kơđi čar hăng wai lăng mơnuih apăn bruă; pơjing khul ling tơhan prong kơtang djop mơta, sit biă ñu lĕ ƀing apăn bruă git gai puih tơhan thâo rơgơi amăng bruă kơđi čar hăng jing ƀing mơnuih ba gru hiam.

Siu Đoan: Pơblang