VOV4.Jarai-Tlam mơmŏt lơ 31/7, ƀơi tơring čar Hòa Bình hơmâo Hơdră adoh suang anăn “Hòa Bình –Thanh âm xứ Mường”, lơphet čơkă hră tŭ yap 2 Anih gru grua hiam pran jua gưl dêh čar: Ia rơgơi tơlơi kơhnâo đưm Lịch tre hăng Ngă yang gru đưm Khai Hạ mơ̆ng djuai ania Mường Hòa Bình. Nao jơnum hrom hơmâo yă Võ Thị Ánh Xuân Kơ-iăng khua mir sir hrom hăng lu khua mua ding jum, anom bruă ƀơi dêh čar. Đĭ pơhiăp ƀơi mông ngă lơphet, Kơ-iăng Khua mir sir yă Võ Thị Ánh Xuân lăi lĕ, gru grua hiam đưm hăng ia rơgơi tơlơi kơhnâo ană mơnuih hơmâo mơ̆ng đưm đă laih ƀơi tơring čar Hòa Bình, mơnuih djuai ania Mường hơmâo pơčeh phrâo lu mơta ia rơgơi tơlơi kơhnâo gru grua hiam, djru pơgôp hrom amăng gru grua hiam mơ̆ng 54 djuai ania adơi ayong lơ̆m dêh čar ta.

Kơ-iăng Khua mir sir yă Võ Thị Ánh Xuân đĭ pơhiăp amăng mông jơnum

Amăng anun, ia rơgơi tơlơi thâo mơnuih ƀôn sang đưm kah hăng Lịch tre ƀudah Lơ ale hăng Ngă yang gru grua Khai Hạ dưi pơpŭ pơ anăn gru grua ia rơgơi hiam đưm ngă mơak pran jua, lir hơbit hăng tơlơi kơhnâo ngă hmua pla pơdai hmua ia. Kơ-iăng Khua mir sir lăi, hơdôm rơnoh yôm hiam klă anun jing kah hăng hrĕ mrai pơtruh nao rai plơi pla, mơnuih ƀôn sang kiăng djru mơnuih ƀôn sang kual lŏn anai dưi găn rơgao tơlơi lông lăng tơnap tap, kjăp tơkai tơngan hrưn đĭ pơ anăp, yak nao man pơdong hăng pơđĭ kyar plơi pla lŏn ia jai hrơi pơdrong asah hiam mơak hloh.

Nay Jek: Pơblang