Mơguah hrơi anai (17/6), ƀơi Hà Nội, Sang hră Kơđi čar dêh čar djă anăn Hồ Chí Minh pơphun Jơnum bơkơtưn khăp kơ lŏn ia tal 6 (2025-2030). Kơ-iăng khua mir sir yă Võ Thị Ánh Xuân - Kơ-iăng khua tal sa Khul apah bơni mơ̆ng Gơnong dlông, hrŏm hăng 193 čô khua jing mơnuih rơgơi mơbruă bơkơtưn khăp kơ lŏn ia rơwang thun 2020-2025 mơ̆ng Sang hră prong hăng hơdôm boh sang hră kơđi čar tơring čar, ƀôn prong nao pơhmư̆ tom. Pơhiăp ƀơi mông Jơnum, Nai prin tha Nguyễn Duy Bắc, Kơ-iăng khua Sang hră kơđi čar dêh čar djă anăn Hồ Chí Minh brơi thâo, mông jơnum kiăng čơkă Jơnum ruah khua ping gah đơ đam dêh čar tal 14, Jơnum bơkơtưn khăp kơ lŏn ia đơ đam dêh čar tal 11, Jơnum ruah khua ping gah Sang hră kơđi čar  tal 15 rơwang thun 2025-2030.

Hla tui tơlơi pơtô mơ̆ng Khua mir sir Hồ Chí Minh khăp ƀu-eng “Bơkơtưn jing tơlơi khăp kơ lŏn ia, khăp kơ lŏn ia jing khŏm bơkơtưn” hăng “bruă rim hrơi jing phun atur či bơkơtưn”, yŭ kơ tơlơi git gai mơ̆ng Ping gah, lu bruă bơkơtưn khăp kơ lŏn ia hơmâo pơphun ngă. Ping gah hăng Kơnuk kơna lăng yôm tơlơi gơgrong bruă mơ̆ng bruă bơkơtưn, apah bơni, lăng anai jing hơdră git gai mơ̆ng Ping gah, bruă wai lăng Kơnuk kơna hăng pơtrut pơsur ngă giong truh kih bruă kơđi čar hơmâo jao.