VOV4.Jarai-Amăng tlam lơ 16/5, ƀơi Văn Miếu-Quốc Tử Giám, Hà Nội, Kơ-iăng Khua mir sir yă Võ Thị Ánh Xuân hơmâo jak iâu Khua mir sir dêh čar Grek, yă Katerina Sakellaropoulou ƀong huă, pŭ asơi añăm hăng mơñum ia trà jum tuai. Yă Võ Thị Ánh Xuân bơni hơ-ơč kơ boh tơhnal hiam klă amăng mông jơnum bơkơtuai nao rai kơplah wah Khua mir sir Grek hăng Khua mir sir ơi Nguyễn Xuân Phúc; đăo kơnang tal rai čuă jơmư anai hơmâo boh tŭ yua hiam klă, djru hrom pơtrut bruă ngă giăng mah dua bơnah Việt Nam hăng Grek ăt pơđĭ kyar na nao hiam klă, kjăp tui.

Lăi pơthâo hăng khua mir sir dêh čar Grek kơ anih anom gru grua Văn Miếu-Quốc Tử Giám, yă Võ Thị Ánh Xuân lăi anai jing anih anom gru grua phun tơlơi hrăm hră yôm phara biă mă mơ̆ng Việt Nam, čih anăn pơpŭ kơ ƀing mơnuih hur har hrăm hră, tŭ yua; mơnuih đăo gưt, pran jua thâo luă gŭ pơpŭ kơ nai pơtô, mơnuih rơgơi kơhnâo kơ lŏn ia djuai ania Việt Nam rơgao hơdôm rơbâo thun. Amăng mông bơ ră ruai mơak klă, jĕ giăm, yă Võ Thị Ánh Xuân jak iâu Khua mir sir dêh čar Grek mut hrom ngă lơphet ngui ngor, bơ ră ruai ƀong mơñum jum tuai laih anun mơñum ia trà tui tơlơi phiăn Việt Nam; dŏ lăng ƀing dra hiam pơdah gru hơbô̆ sum ao dai laih anun lăng adoh suang đưm hiam klă mơ̆ng djuai ania Việt Nam.

Nay Jek: Pơblang