VOV4.Jarai-Mơguah lơ 17/6, Kơ-iăng Khua mir sir yă Võ Thị Ánh Xuân hơmâo tŭ jum grup đah kơmơi mơgăt rơdêh Trường Sơn. Blan 12/1968, Ping gah Anom bruă tơhan Trường Sơn hơmâo akŏ pơjing grup đah kơmơi mơgăt rơdêh Trường Sơn kiăng djru kơ tơhan amăng jang guai dêh čar. Pơhiăp ƀơi mông jơnum, pơ ala kơ Ping gah, kơnuk kơna, Kơ-iăng Khua mir sir yă Võ Thị Ánh Xuân mơ-it hiăp pơpŭ kơ ƀing đah kơmơi mơgăt rơdêh Trường Sơn hăng tơlơi khăp hơdor tơngia laih anun tơlơi bơni hiam klă hloh.

Kơ-iăng Khua mir sir ƀơk gơnam djă pioh kơ ƀing đah kơmơi ngă tơhan mơgăt rơdêh Trường Sơn

Kơ-iăng Khua mir sir čih pioh hăng lăng yôm tơlơi pơgôp pran jua prong prin mơ̆ng ƀing đah kơmơi ngă tơhan mơgăt rơdêh Trường Sơn amăng rơnuk blah ayăt Mi pơklaih rơngai lŏn ia. Kơ-iăng Khua mir sir lăi rơđah, tơlơi tuh drah pơčah asar pơsăn drơi kret kruai đơ đa ƀu hơmâo pô thâo, gơñu gum hrom djuai ania ta ngă rai sa bruă hing ang prong. Kơ-iăng Khua mir sir čang rơmang ding jum ling tơhan, anom bruă čem rông tơhan, anom bruă wai lăng rơdêh pơgiăng gơnam tơhan ăt gleng nao lu hloh kơ ƀing tơhan hơđăp đah kơmơi mơgăt rơdêh Trường Sơn.

Nay Jek: Pơblang