VOV4.Jarai-Ƀơi anom bruă khua mir sir, yă Võ Thị Ánh Xuân Kơ-iăng khua mir sir tŭ jum khul khua mua đah kơmơi ngă bruă amăng sang bruă prăk ƀrô Hơdor glăi hrơi jar kmar pioh kơ đah kơmơi hrơi lơ 8/3. Ƀơi mông tŭ jum, Khua sang bruă prăk kơnuk kơna Việt Nam, yă Nguyễn Thị Hồng brơi thâo, mrô đah kơmơi truh 60% mă bruă amăng glông sang bruă prăk laih anun hơmâo 24% mrô đah kơmơi ngă khua apăn bruă prong. Anom bruă prăk hlăk pok pơhai bruă mă hơdră wai lăng prăk kăk đơ đam dêh čar truh thun 2025, anăp nao thun 2030, amăng anun đah kơmơi yơh khul mơnuih lăp đing nao.

Kơ-iăng Khua mir sir, yă Võ Thị Ánh Xuân mơ-it hiăp pơpŭ bơni  hơdôm tơlơi pơpŭ hiam klă hloh kơ ƀing đah kơmơi apăn bruă sang bruă prăk lăi pha hăng abih bang đah kơmơi amăng dêh čar ta hnun mơ̆n, lăi pơtong, anom bruă prăk hăng abih bang djop sang bruă hơmâo gum hrom sang bruă djop djuai ania mơnuih mơnam, djop sang bruă, khul mut phung kơđi čar, mơnuih mơnam pok pơhai ngă tui hơdră djru ba pơgang tơlơi hơdip mơda kơ mơnuih ƀôn sang, ngă bruă tơlơi khăp pap, hơdor tơngia tla pran. Khua mua anom bruă prăk kơnuk kơna Việt Nam ăt đing nao lăng ba djop abih bang khua mua, mơnuih apăn bruă jing đah kơmơi, pơtô pơhrăm bruă kiăng đah kơmơi amăng bruă hur har tuh rơyuh pran jua mă bruă pơgôp hrom đơ đam dêh čar tŭ yua hloh.

Nay Jek: Pơblang