VOV4.Jarai - Lơ 7/6, ƀơi sang bruă Khua mir sir, Kơ-iăng khua mir sir yă Võ Thị Ánh Xuân tŭ jum mơnuih pơ ala ƀing hơkrŭ lŏn ia đưm tơring čar Đồng Nai ƀrô hrơi khul anai nao čuă plơi prong jưh jom Hà Nội, mut nao čuă pơsat jep Wa Hồ. tơring čar Đồng Nai ră anai hơmâo rơbêh 52 rơbâo čô mơnuih gum hơkrŭ lŏn ia đưm hăng sang anŏ ƀing hơkrŭ lŏn ia. Amăng anun hơmâo 1 rơbâo 141 čô amĭ Việt Nam sông kơtang. Ră ruai tom hăng ƀing khua pơ ala mơnuih hơkrŭ lŏn ia tơring čar Đồng Nai, Kơ-iăng khua mir sir yă Võ Thị Ánh Xuân bơni kơ hơdôm tơlơi gir run mơng tơring čar Đồng Nai amăng bruă djru mơnuih hơkrŭ lŏn ia ta; kiăng tơring čar Đồng Nai iâu pơthưr  abih bang mơnuih gum djru ba mơnuih hơkrŭ lŏn ia đah mơng hơdip dơnap ƀiă; biă ñu amăng bruă man pơkra sang dŏ. Kơ-iăng khua mir sir ăt čang rơmang ƀing gum hơkrŭ lŏn ia tơring čar Đồng Nai pơtrut tui pran jua khăp kơ lŏn ia, pơtô pơblang brơi abih bang mơnuih bon sang hla tui jơlan hơdră ngă bruă mơng Ping gah, tơlơi phiăn mơng Kơnuk kơna, akŏ pơdong lŏn ia ta jai hrơi hiam, pơdrong asah.

Siu H’Mai: Pơblang