VOV4.Jarai - Ƀrô tal hơdor glăi 75 thun hrơi tơhan rơka, tơhan djai pơsăn drơi, mơguah lơ 25/7, ƀơi Ƀirô mă bruă, Kơ-iăng Khua mir sir yă Võ Thị Ánh Xuân tŭ jum ƀing khua mua amăng Khul tơhan đah kơmơi Trường Sơn - Jơlan Hồ Chí Minh. Đĭ pơhiăp amăng mông bưp, Kơ-iăng Khua mir sir yă Võ Thị Ánh Xuân pơdah pran hok mơ-ak lơ̆m bưp ƀing tơhan đah kơmơi Trường Sơn sông kơtang; Kơ-iăng khua mir sir tŭ yap hăng lăng yôm hơdôm tơlơi gum pơgôp prong prin mơng tơhan đah kơmơi Trường Sơn amăng rơnuk blah ayăt Mi pơklaih rơngai lŏn ia. Hăng pơsit tong, pran gum pơgôp, tuh rơyuh pran jua mơng tơhan đah kơmơi Trường Sơn ba glăi tơlơi dưi prong hrŏm hăng djuai ania ta dưi pơklaih rơngai lŏn ia. Rup rap ƀing tơhan đah kơmơi lĕ gru hiam brơi djop rơnuk hrăm tui. Kơ-iăng Khua mir sir čang rơmang ƀing tơhan đah kơmơi Trường Sơn tŏ tui bruă jao, lĕ ƀing mơnuih djă pioh gru grua ngă hơkrŭ pơtô glăi ană tơčô, ƀing adơi amai amăng plơi pla ala ƀon, anih anom mă bruă thâo gum pơgôp, pơplông amăng bơwih ƀong huă, pơtô pơhrăm, pơjing tơlơi hơdip pơplih phrâo.

Siu Đoan: Pơblang