VOV4.Jarai - Ƀrô tal hơdor glăi 75 thun hrơi Tơhan rơka - tơhan djai pơsăn drơi jăn (27/7), mơguah lơ 6/7, ƀơi Ƀirô mă bruă, Kơ-iăng Khua mir sir yă Võ Thị Ánh Xuân bưp ƀing mơnuih djru hơkrŭ ba gru amăng tơring čar Bắc Kạn. Hiăp bit hăng ƀing mơnuih djru hơkrŭ, Kơ-iăng khua mir sir yă Võ Thị Ánh Xuân lăng yôm tơring čar Bắc Kạn mah dŏ bưp tơnap tap samơ̆ lêng kơ ngă klă amăng bruă hơdor tơngia, djru brơi tơlơi hơdip mơda ƀơi ƀon lan, jâk iâu abih bang mơnuih gum pơgôp kiăng kơ djru brơi ƀing mơnuih djru hơkrŭ.

Kơ-iăng khua mir sir rơkâo tơring čar Bắc Kạn tŏ ngă tui hơdôm boh than dưi ngă amăng thun blan laih rơgao; gir pơtô pơblang djop anih, pơtô glăi gru grua khăp kơ lŏn ia mơng djuai ania brơi kơ abih bang mơnuih, laih dong gru grua wai pơgang lŏn ia, hơdor tơngia ƀing mơnuih djru hơkrŭ mơng anai pơ anăp; pel ĕp glăi ƀing mơnuih djru hơkrŭ amăng tơring čar kơ tơlơi hơdip mơda, tơlơi suaih pral, prăk pơhrui kiăng kơ rơkâo đĭ Kơnuk kơna, kiăng kơ djru brơi mơnuih djru hơkrŭ hmao tlôn.

Siu Đoan: Pơblang