Mơguah lơ 19/7, ƀơi plơi prong Quy Nhơn, tơring čar Bình Định, Kơ-iăng Khua pơ ala mơnuih ƀôn sang dêh čar ơi Trần Quang Phương git gai jơnum mă hiăp pơgôp kơ hơdrôm hră Tơlơi phiăn čih pơhrua  hơdôm mơta tơlơi amăng Tơlơi phiăn krăo lăng mơ̆ng ƀing pơ ala mơnuih ƀôn sang dêh čar hăng ƀing pơ ala mơnuih ƀôn sang tơring čar. Jơnum bơkơtuai anai hơmâo khua mua anom bruă pơ ala mơnuih ƀôn sang 10 boh tơring čar, ƀôn prong kual Tong krah, kual Dap Kơdư hăng khua mua pơ ala mơnuih ƀôn sang djop tơring glông, plơi prong amăng tơring čar Bình Định. Tơdơi kơ 8 thun ngă tui Tơlơi phiăn  krăo lăng mơ̆ng ƀing pơ ala mơnuih ƀôn sang dêh čar hăng ƀing pơ ala mơnuih ƀôn sang ƀơi tơring čar, bruă mă krăo lăng mơ̆ng ƀing pơ ala mơnuih ƀôn sang dêh čar, ƀing pơ ala mơnuih ƀôn sang tơring čar jai hrơi hơmâo boh tŭ yua, tŭ mă lu boh tơhnal yôm, mơnuih ruah khua hăng mơnuih ƀôn sang lăng yôm biă mă.

Ƀơi mông jơnum bơkơtuai, ƀing pơ ala mơnuih ƀôn sang  ăt hơmâo pơčrâo rơđah anŏ dŏ kơƀah amăng Tơlơi phiăn krăo lăng mơ̆ng ƀing pơ ala mơnuih ƀôn sang dêh čar hăng ƀing pơ ala mơnuih ƀôn sang tơring čar thun 2015 laih anun rơkâo pơblih ƀiă boh yôm phun pơkă amăng hơdrôm hră tơlơi phiăn anai, pơhrua nao dơ̆ng Tơlơi phiăn krăo lăng mơ̆ng ƀing pơ ala mơnuih ƀôn sang dêh čar hăng ƀing pơ ala mơnuih ƀôn sang tơring čar. Pơhiăp ƀơi mông jơnum, Kơ-iăng khua pơ ala mơnuih ƀôn sang dêh čar ơi Trần Quang Phương brơi thâo, jơnum bơkơtuai anai hơmâo tŭ mă lu tơlơi pơgôp hiăp mơ̆ng ƀing pơ ala mơnuih ƀôn sang djop tơring čar. Kơ-iăng khua pơ ala mơnuih ƀôn sang dêh čar ơi Trần Quang Phương rơkâo, amăng tơlơi brơi pơblih pơhrua glăi lơ̆m hơdrôm hră tơlơi phiăn anai jing pơdjơ̆ nao anŏ aka ƀu găl, hnơ̆ng pơkă, anŏ pơkă, hơdră pơkă laih anun boh tơhnal ngă tui tơlơi phiăn kiăng djơ̆ hăng tơlơi pơtrun hrŏm.