VOV4.Jarai-Lơ 14/1, Kơ-iăng Khua git gai pơ ala mơnuih ƀôn sang dêh čar ơi Trần Quang Phương hrom hăng grup nao mă bruă čuă jơmư, pơpŭ Tết kơ khua mua, tơhan trung đoàn tơhan pơlih blah ngă ƀơi kual Dơnung yŭ hăng Lữ đoàn tơlơi pơhing 29, QK9 tơhan kual 9.

Lăi pơthâo hăng Kơ-iăng Khua git gai pơ ala mơnuih ƀôn sang dêh čar hăng grup mă bruă, Thượng tá Nguyễn Tấn Phúc, Khua Trung đoàn tơhan pơlih blah ngă kual Dơnung yŭ brơi thâo, truh ră anai, khul khua mua, ling tơhan amăng Trung đoàn pơphun bruă mă hơđong laih djop gưl amăng djop bruă; mrô tơhan prăp lui blah ngă ngă hrom lu anom bruă pre lui yơh, tui hluai bruă jao mơ̆ng Ding jum kông an, kông an djop tơring čar kiăng tơgŭ ngă bruă pơkơdong glăi lu tơlơi soh sat pơprong, pơsir hơdôm tơlơi hơmâo ječ ameč, kiăng pơgăn mơnuih soh sat.

Đĭ pơhiăp ƀơi mông jơnum, Kơ-iăng Khua git gai pơ ala mơnuih ƀôn sang dêh čar ơi Trần Quang Phương pơtă pơtăn pơ anăp anai, Trung đoàn tơhan pơlih blah ngă kual Dơnung yŭ khom pơtô kjăp ngă tui klă Tơlơi pơčrâo trun mơ̆ng Ping gah, Kơnuk kơna, anom bruă ping gah kông an, gah Ding jum kông an jao bruă pơgang tơlơi rơnuk rơnua dêh čar. Blung hlâo lĕ, pơgang tơlơi rơnuk rơnua amăng hrơi ngă yang thun phrâo djuai ania thun Nhâm Dần 2022 tui hăng tơlơi git gai mơ̆ng djop anom bruă, hrom hăng khua mua laih anun tơhan amăng kual djru ba hrơi ƀong tết mơak kơ abih bang  ling tơhan amăng Trung đoàn.

Nay Jek: Pơblang