VOV4.Jarai-Pơdjơ̆ nao bruă ngă sat lŏn glai yua čuk pơkra jơla Trường Sơn Đông, koh drôm kyâo, čuk jơlan amăng dua blah đang glai dêh čar wai lăng Čư̆ Yang Sing tơring čar Dak Lak hăng glai Bi Doup-Núi Bà tơring čar Lâm Đồng, lơ 16/5, Grup khua mua mơ̆ng sang bruă pơ ala mơnuih ƀôn sang dêh čar hăng khua mua pơ ala hơdôm ding jum, anom bruă gơnong dlông nao ĕp truh pơ anih čuk jơlan kiăng pơtong lăng sit nik ƀơi Lâm Đồng. grup anai yua kơ Thượng tướng Trần Quang Phương, Kơ-iăng Khua git gai pơ ala mơnuih ƀôn sang dêh čar ba jơlan hlâo.

Grup khua mua mơ̆ng anom bruă pơ ala mơnuih ƀôn sang dêh čar hăng hơdôm ding jum anom bruă gơnong dlông nao ĕp lăng, pơsit tơl anih čuk pơkra jơlan Trường Sơn Đông gah Lâm Đồng

Amăng dua hrơi, lơ 16 hăng 17 blan 5, grup nao ĕp lăng, pơtong glăi tơl anih čuk jơlan Trường Sơn Đông, laih anun hơmâo mông mă bruă hăng khua jơnum min mơnuih ƀôn sang tơring čar Lâm Đồng. Hlâo kơ anun, kah hăng tơlơi pơhing Gong phun jua pơhiăp Việt Nam pôr, rơnuč blan 1 akŏ blan 2 thun 2022, lu anom bruă kơnuk kơna dua boh tơring čar Dak Lak hăng Lâm Đồng ƀuh anom bruă čuk jơlan Trường Sơn Đông tŭ hyu čuk mă, koh drôm kyâo truh 10 km, mut nao amăng lŏn glai dêh čar wai lăng khŏp ƀơi Čư̆ Yang Sing gah Dak Lak hăng Bi Doup-Núi Bà gah Lâm Đồng.

Blung a pơtong glăi lĕ, anom bruă čuk pơkra jơlan anun phă glai pơrai rưng lơ̆m aka ƀu hơmâo hră tŭ ư brơi čuk hăng pơblih bruă yua lŏn djơ̆ tơlơi phiăn, hơmâo anom bruă čuk jơlan rơgao guai pơkă. Bruă ngă anai soh hăng tơlơi phiăn kơnuk kơna kơtang biă mă.

Nay Jek: Pơblang