VOV4.Jarai - Truh mông anai ƀơi tơring čar Kon Tum hơmâo lu mơnuih arăng plư nao mă bruă pơ dêh čar Kur ngă “bruă amuñ prăk lu” laih anun abih bang ƀing ñu lêng kơ thun aset. Kiăng mơnuih ƀon sang, biă ñu lĕ plơi pla giăm guai dêh čar hăng mơnuih ƀon sang djuai ƀiă huăi djơ̆ kơđông “bruă amuñ prăk lu”, tơhan pơgang guai Kon Tum hăng gong gai glăk pơtrut hyu pơtô pơblang djru mơnuih ƀon sang thâo kơđiăng hlâo.

Tơdơi kơ tơhan pơgang guai tơring čar Kon Tum djru pơklaih brơi adơi Y Liên, 16 thun, sang ñu pơ plơi Kei Joi, să ƀơi guai Đăk Xú, tơring glông Ngọc Hồi mơng dêh čar Kur glăi pơ dêh čar ta amăng rơnuč blan 8 laih rơgao, tơhan puih kơđông tơhan pơgang guai Đăk Xú ngă hrŏm hăng gong gai hyu pơtô, pơblang kiăng ană plơi thâo hluh kơ bruă mă amuñ samơ̆ prăk apah lu lĕ tơlơi arăng plư đôč. Trung tá Nguyễn Đình Thạch, Khua puih kơđông pơgang guai Đăk Xú brơi thâo:“Anom bruă hơmâo ngă hrŏm hăng gong gai pơphun pơtô pơblang kơ tơlơi plư pleč, bruă ngă sat mơng ƀing plư hlăi ai čơđai muai nao mă bruă pơ dêh čar tač rơngiao, biă ñu dêh čar Kur, anun lĕ mă bruă amuñ prăk apah lu. Anom bruă hơmâo brơi grup pơtô pơblang mơnuih ƀon sang nao truh pơ plơi pla lăi pơthâo hăng sang anŏ, kơđiăng hơdôm tơlơi tui anai”.

Tơhan puih kơđông pơgang guai Đăk Xú nao čuă jơmư, juh alum adơi Y Liên hăng sang anŏ.

Tui hăng ơi Đào Tuấn, Khua Jơnum min mơnuih ƀon sang să Đăk Xú, tơring glông Ngọc Hồi, amăng rơbêh 7.000 čô mơnuih mơng să, neh met wa djuai ƀiă hơmâo truh 60%. Hrŏm hăng pơtrut pơtô pơblang kiăng ană plơi thâo hluh kơđông “bruă amuñ prăk lu”, Ping gah, gong gai să ĕp hơdră kiăng mơnuih mă bruă mơng să hơmâo bruă mă lăp djơ̆ hăng hơđong:“Grup ping gah, biă ñu lĕ anom bruă wai lăng plơi thâo ană bă sang anŏ hlơi kiăng hơduah bruă amăng tơring čar wơ̆t hăng gah rơngiao tơring čar. Ping gah, gong gai pơhiăp tom hăng hơdôm anih hơduah bruă, nao mă bruă pơ dêh čar tač rơngiao kiăng pơhlôm hơmâo Kơnuk kơna pơgang ba hŭi ƀing ană amon hăng ƀing mă bruă hơmâo arăng plư mă tui hăng ƀing phrâo hơmâo lăi nao”.

Tơhan pơgang guai Kon Tum thâo kơjăp bruă hơmâo amăng plơi pla, pơtô pơblang hŭi ană plơid djơ̆ kơđông “bruă amuñ prăk lu”.

Tơring čar Kon Tum hơmâo jơlan guai hăng dua boh dêh čar Lao hăng Kur. Thâo laih ƀing ƀu klă amra pơhmao mă, plư ană plơi amuñ ƀong ia bah, ƀu thâo phe phô mơng hlăk ai kiăng tañ hơmâo prăk, tañ pơdrong, tơhan pơgang guai Kon Tum glăk ngă hrŏm hăng gong gai, khul grup thâo kơjăp bruă hơmâo amăng plơi pla đah mơng pơgăn tañ, hŭi ană plơi djơ̆ kơđông “bruă amuñ prăk lu”. Đại tá Lê Quốc Việt, khua git gai Puih kơđông tơhan tơring čar Kon Tum brơi thâo:“Anom bruă git gai tơhan ăt git gai laih kơ hơdôm Puih kơđông pơtô pơblang brơi dong kiăng mơnuih ƀon sang thâo kơđiăng hŭi arăng plư pleč, jak iâu, biă ñu lĕ ƀing hlăk ai amuñ hơmâo arăng plư nao mă bruă pơ dêh čar Kur biă. Laih dong Anom bruă git gai tơhan ăt lăi pơthâo laih hăng Ping gah, Jơnum min mơnuih ƀon sang tơring čar khŏm ngă hrŏm gah bruă anai. Ƀing gơmơi hơmâo ngă bruă hăng 4 boh tơring glông hơmâo guai dêh čar laih anun kiăng tơring glông git gai hơdôm anom bruă bơdjơ̆ nao ngă hrŏm hăng tơhan pơgang guai ngă klă bruă wai lăng, pơtô pơblang mơnuih ƀon sang huăi hơmâo arăng plư, jak nao mă bruă pơ dêh čar Kur”.

Khoa Điềm: Čih - Siu H’Mai: Pơblang