VOV4.Jarai-Tlam lơ 24/1, ƀơi plơi prong Kon Tum, Khua mua phun ping gah tơring čar Kon Tum jơnum pơƀut bruă mă hăng ƀing čih tơlơi pơhing thun 2021 laih anun bưp 135 čô pơ ala mơnuih kơhnâo mơbruă, ƀing adoh suang, ƀing čih tơlơi pơhing phrâo čơkă thun 2022. Tui hăng anom pơtô bruă ping gah tơring čar Kon Tum pơtong glăi, laih anun tơlơi đĭ pơhiăp ƀơi mông jơnum mơ̆ng Khua git gai Ping gah, Khua jơnum min pơ ala mơnuih ƀôn sang tơring čar Kon Tum, ơi Dương Văn Trang brơi ƀuh, thun 2021 lơ̆m klin kheng Covid 19 ăt tơnap tap samơ̆ tơring čar Kon Tum hơmâo ngă djơ̆ tơhnal pơtrun dua bruă pơgang klin kheng rah hăng pơtrut bơwih ƀong huă pơđĭ kyar mơnuih mơnam hơmâo ba glăi boh tơhnal tŭ yua yôm.

Mông jơnum pơƀut bruă mă pơhing phrâo thun 2021 hăng bưp mơnuih kơhnâo mơbruă, pơčeh adoh suang hăng čih tơlơi pơhing kŏ thun phrâo 2022

Dưi hơmâo boh tơhnal anai, yua hơmâo tơlơi pơgôp hrom prong biă mă mơ̆ng mơnuih kơhnâo rơgơi, ƀing mơbruă, khul adoh suang, pơčeh tơlơi hơ̆k hơr hăng ƀing čih tơlơi pơhing lăi pơthâo gru grua, anŏ hiam, tơlơi klă mơ̆ng djop djuai ania tơring čar Kon Tum.

Khua git gai ping gah, Khua jơnum min pơ ala mơnuih ƀôn sang tơring čar Kon Tum ơi Dương Văn Trang bơ ră ruai hăng ƀing čih tơlơi pơhing, mơnuih kơhnâo mơbruă adoh suang, pơčeh tơlơi hơ̆k hơr.

Khua mua ping gah tơring čar Kon Tum pơtrun hiăp, brơi djop anom bruă, djop khul, djop gưl sang bruă kơnuk kơna ăt khom ngă gêh găl, djru ƀing mơnuih kơhnâo mơbruă, ƀing čih tơlơi pơhing ngă klă bruă pôr pơthâo tơlơi pơhing tui hăng tơlơi thâo gơñu amăng bruă mă; čang rơmang ƀing čih tơlơi pơhing hăng mơnuih rơgơi kơhnâo, mơnuih mơbruă djru hrom lu hloh amăng bruă man pơdong laih anun pơđĭ kyar tơring čar Kon Tum.

Nay Jek: Pơblang