VOV4.Jarai - Amăng 2 hrơi rơgao, bruă ơi Chu Ngọc Anh, Khua hơđăp jơnum min mơnuih ƀon sang ƀon prong Hà Nội hăng ơi Nguyễn Thanh Long, Khua hơđăp ding jum ia jrao hơmâo Ping gah dêh čar ta brơi tơbiă đuăi mơng ping gah, brơi pơdơi bruă, hơmâo ngă kơđi, mă krư̆ jăng jai jing tơlơi pơhing hơmâo ƀing khua, mơnuih ping gah hăng mơnuih ƀon sang Kon Tum lăp đing nao. Ơi Trương Duy Cảnh, 69 thun, 40 thun mut ping gah, dŏ ƀơi mrô sang 104 jơlan Phạm Văn Đồng, phường Lê Lợi, prơi prong Kon Tum pơdah pran jua, bruă pơgăn ƀing hưp ham ƀong ngăn kơnuk kơna jing bruă hơmâo ngă na nao mơng Ping gah. Samơ̆ ñu aka ƀu ƀuh djơ̆ ôh bruă anai hơmâo ngă khut khăt, ječ ameč tui anai.

Ơi Trương Duy Cảnh

Mơng bruă ơi Chu Ngọc Anh hăng Nguyễn Thanh Long, ñu jai đăo gơnang hloh kơ bruă pơkơdong glăi ƀing hưp ham ƀong ngăn hơdăp kơnuk kơna hăng đăo gơnang kơ Khua git gai Ping gah Nguyễn Phú Trọng:

“Kâo đăo gơnang abih pran jua hăng Ping gah ta hơmâo ngă khut khăt bơtơhmal ƀing pơhmao mă tơlơi ngă khua lĕ ƀong prăk kăk dêh čar, hơmâo tơlơi pơmin sat tui anun. Phrâo anai, Khua ding jum ia jrao Nguyễn Thanh Long hăng ơi Chu Ngọc Anh, lêng kơ ngă khua prong, samơ̆ ƀu djơ̆ ta ngă khua lĕ ta či ngă hơget ngă ôh. Kâo čang rơmang abih bang ƀing ta gum tơngan akŏ pơdong hăng gum pơkơdong glăi ƀing hưp ham ƀong kông ngăn, pơgăn tơlơi pơmin ƀu klă hăng ƀing khua, mơnuih ping gah”.

Siu H’Mai: Pơblang