VOV4.Jarai -  Ƀơi tơring čar Kon Tum amăng thun blan klin Covid-19 lar hyu ngă kơ lu mơnuih mă bruă djuai ania ƀiă khŏm pơdơi bruă, rơngiă bruă mă hăng tơnap ĕp glăi bruă. Kiăng kơ hluai tui tơlơi sit nik, djop anom bruă bơdjơ̆ nao amăng tơring čar Kon Tum glăk pơtrut bruă lăi pơthâo, ĕp brơi bruă mă kơ mơnuih ƀon sang glăk kiăng bruă, hơđong tơlơi hơdip hăng pơgiong hơnong pơkă ba tơbiă amăng thun anai, lĕ ĕp brơi bruă mă kơ 6.200 čô mơnuih hăng lu hloh lĕ mơnuih djuai ania ƀiă.

Hơmâo pơphun amăng sa hrơi rơnuč blan 2 laih rơgao, amăng mông lăi pơthâo, ĕp brơi bruă mă, hrăm bruă thun 2022 yua kơ anom bruă hơduah ĕp bruă mă tơring čar Kon Tum git gai ƀơi să Sa Nghĩa, tơring glông Sa Thầy pơhưč giăm 100 čô mơnuih mă bruă amăng ƀon lan. Ơi A Tran, dŏ ƀơi plơi Đăk Tân brơi thâo, lơ̆m klin Covid-19 lar hyu kơtang, ană tơčoa sang anŏ ñu mă bruă ƀơi tơring čar Bình Dương pơdơi bruă glăi pơ plơi pla. Ră anai ană tal 2 ăt 18 thun laih, yua anun kiăng ĕp bruă brơi kơ ñu dong:

“Sang anŏ gơmơi pla rơbêh 1.000 phun kơphê. Sang hơmâo 7 čô ană ăt tơnap tap mơn. Čang rơmang ƀing ană bă hơmâo bruă kiăng sang anŏ hơmâo dong prăk pơhrui. Čang rơmang hơdôm anom bruă djru brơi sang dŏ, rơdêh nao rai. Dua dong lĕ prăk apah lu ƀiă”.

Ĕp brơi bruă mă pơ tơring čar pơkŏn brơi mơnuih ƀon sang

Nao hmư̆ arăng lăi pơthâo kơ bruă mă, amai Y Hương ăt kah hăng ƀing mơnuih mă bruă pơkŏn amăng să Sa Nghĩa lêng kơ čang rơmang tañ hơmâo bruă mă lăp djơ̆ hăng pran hor, hơmâo prăk apah hơđong kiăng tơlơi hơdip plai ƀiă tơnap tap:

“Sang anŏ ngă đang kơphê hơmâo 3 ar, ră anai glăk tơnap tap biă mă. Čang rơmang anom bruă hơduah ĕp bruă mă ĕp brơi bruă hơđong. Kâo ăt kiăng hơmâo bruă amăng tơring čar, mă bruă pơ ataih glêh tơnap biă mă”.

Amăng hrơi blan laih rơgao, lu anom bơwih ƀong sĭ mơdrô hơmâo mơ-it Gơnong bruă mă, tơhan rơka hăng mơnuih mơnam tơring čar Kon Tum kiăng kơ djru  ĕp mơnuih mă bruă hăng mrô rơbêh 10.000 čô mơnuih. Amăng tơring čar mơtăm arăng kiăng ĕp mơnuih mă bruă ăt lu mơn. Samơ̆ yua lu mơnuih kiăng bruă mă lĕ mơnuih djuai ania ƀiă yua anun kiăng kơ ruah hơdôm anom bơwih ƀong sĭ mơdrô pơhlôm brơi anih mă bruă, hơdră djru klă kiăng kơ lăi pơthâo hăng pơphun pơtô pơhrăm brơi boh thâo kơ mơnuih mă bruă. Yă Nguyễn Thị Nga, Khua anom bruă hơduah ĕp bruă tơring čar Kon Tum brơi thâo:

“Hlâo kơ ba mơnuih nao mă bruă pơ hơdôm tơring čar, bruă pơtô pơhrăm brơi boh thâo kơ mơnuih mă bruă, biă mă ñu amăng tơlơi hơdip, hiăp bit ƀơi anih mă bruă. Thâo hơdip hrŏm hăng ƀing pơkŏn. Bruă mă amăng hơdôm sang măi. Lăi pơthâo brơi kơ hơdră djru, tơlơi dưi, tơlơi glăm ba lơ̆m mă bruă ƀơi hơdôm anom bơwih ƀong sĭ mơdrô. Sit biă ñu lĕ mă bruă hăng hơdôm anom bruă hơduah ĕp bruă mă pơ tơring čar pơkŏn kah hăng hơdôm anom bơwih ƀong sĭ mơdrô kiăng kơ prap lui anih dŏ hơdip hơđong brơi kơ mơnuih mă bruă”.

Črâo brơi bruă mă kơ mơnuih djuai ania ƀiă

Hrŏm hăng bruă djru brơi mơnuih hơmâo bruă mă, ră anai djop anom bruă bơdjơ̆ nao amăng tơring Kon Tum ăt glăk tŏ ngă tui sa, dua hơdră kiăng kơ djru, pơtrut pơsur, pơ alum pran jua mơnuih mă bruă, anun lĕ: djru brơi prăk test Covid-19; djru brơi prăk đĭ rơdêh, prăk mơñum ƀong lơ̆m đĭ rơdêh hăng pơkiăo nao mơnuih ba mơnuih mă bruă nao tơl anih mă bruă. Amăng thun blan mơnuih mă bruă ƀơi hơdôm sang măi, anom bơwih ƀong sĭ mơdrô pơ tơring čar pơkŏn, anom bruă bơdjơ̆ nao amăng tơring čar Kon Tum ăt amra kiăo tui lăng kiăng kơ tơlơi bruă mă, laih dong djru brơi hmao tlôn lơ̆m mơnuih mă bruă dja djuam duam ruă ƀudah hơmâo bruă hơget thơ.

Khoa Điềm: Čih

Siu Đoan: Pơblang