Ping gah tơring glông giăm guai Sa Thầy, tơring čar Kon Tum hơmâo 53 grup Ping gah ƀon lan hăng giăm 2.100 čô mơnuih apăn bruă Ping gah. Tơdơi kơ hơmâo Ping gah tơring čar Kon Tum ruah pơphun jơnum Ping gah gưl tơring glông, lơ 14/7/2024 Khul apăn bruă Ping gah tơring glông Sa Thầy hơmâo pơtrun akŏ bruă mrô 208 kơ prap lui hăng pơphun jơnum Ping gah djop gưl rơwang thun 2025-2030. Yă Y Sâm, kơ-iăng khua git gai Ping gah tơring glông Sa Thầy brơi thâo, tơring glông hơmâo pơphun hruă kjăp bruă prap lui jơnum tơl ƀing apăn bruă phun, laih dong akŏ pơjing grup ruah mơnuih apăn bruă, grup čih hră pơsit hăng grup djru brơi jơnum tal anai:

“Kiăng kơ prap lui klă jơnum, Khul apăn bruă Ping gah tơring glông git gai djop anih anom, sit biă ñu lĕ grup ruah mơnuih apăn bruă prap lui bruă ruah khua mua djơ̆ hăng tơlơi pơkă, tui tơlơi črâo ba mrô 35 hăng hơdôm hră pơ-ar črâo ba mơng Khul pơphun gơnong glông kơ bruă ruah khua mua. Hăng hră pơsit ră anai lĕ git gai Jơnum min mơnuih ƀôn sang tơring glông hăng djop gơnong bruă pel ĕp glăi hơdôm hơnong pơkă amăng tơlơi pơtrun jơnum Ping gah rơwang thun 2020-2025 hăng hơdôm bruă jao kơđi čar amăng ƀon lan”.

Hrŏm hăng bruă prap lui jơnum Ping gah tơring glông, Ping gah tơring glông Sa Thầy git gai djop khul ping gah pơjing akŏ bruă prap lui jơnum mơng anih anom tui tơlơi rơkâo, boh tơhnal amăng tơlơi črâo trun mrô 35 mơng ding jum kơđi čar.

Tui anun, djop grup amăng Ping gah ƀon lan amra pơgiong bruă pơphun jơnum hlâo kơ lơ 30/11/2024. Ping gah să Ya Xiêr hơmâo Ping gah tơring glông Sa Thầy ruah pơphun jơnum djưl ƀon lan hiam lăng pơphun amăng lơ 6/1/2025. Ơi Phan Chí Thiện, Khua git gai Ping gah să Ya Xiêr brơi thâo, ră anai abih bang 13 grup Ping gah să glăk ječ ameč pơgiong bruă prap lui pơphun jơnum:

“Abih bang grup Ping gah hơmâo lăi pơthâo tañ hloh kơ bruă pơphun jơnum ƀơi hơdôm boh să. Djop grup lêng gơgrong čih pơkra hră pơtrun pơsit, truh ră anai djop grup glăk čih pơkra hră pơtrun pơsit, glăk mă tơlơi pơgôp hiăp mơng hơdôm anom bruă bơdjơ̆ nao kiăng hơmâo sa hră lăi pơthâo kơđi čar, hră lăi pơthâo lăng glăi bruă aka ƀu klă hăng djơ̆ tơlơi sit nik. Akŏ blan 10 djop khul grup amra mơ-it nao hră ruah mơnuih apăn bruă brơi kơ Khul apăn bruă Ping gah să sem lăng hăng pơgôp hiăp”.

Hrŏm hăng tơlơi gơgrong prap lui klă jơnum rơwang phrâo, djop khul grup Ping gah ƀon lan amăng tơring glông Sa Thầy, tơring čar Kon Tum ăt glăk pơtrut kơtang bruă pơplông pioh čơkă jơnum Ping gah djop gưl. Pel ĕp, ječ ameč gir run pơgiong truh kih hơdôm hơnong pơkă mơ̆ rơwang hlâo anun ba tơbiă. Laih dong mơng tơlơi rơkâo sit nik pơsit tong hơdôm hơnong pơkă tong ten rơwang phrâo. Ayong A Tớ, Khua git gai Ping gah ngă rah Khua plơi O, să Ia Xiêr brơi thâo:

“Tơdơi kơ pơđut hĭ rơwang thun 2022-2025, tui tơlơi git gai mơng Ping gah să Ia Xiêr, tŏ tui prap lui jơnum rơwang thun 2025-2027, hrŏm hăng anun ƀing apăn bruă Ping gah ăt gir run pơtrut pơsur neh met wa pơplih pơkra đang hmua kiăng mut hrŏm ngă tui jơlan hơdră hơnong pơkă dêh čar pơđĭ kyar bơwih ƀong huă. Kiăng prap lui jơnum rơwang thun 2025-2027, khul Ping gah ăt jơnum kiăng kơ prap lui bruă ruah khua mua, čih pơkra hră lăi pơthâo, lăng glăi anŏ aka ƀu klă, truh ră anai hơmâo pơgiong laih, tui đăo lăng hlâo amăng lơ 16/10/2024 khul Ping gah plơi O amra pơphun jơnum”.

Truh ră anai tơring glông Sa Thầy, tơring čar Kon Tum hơmâo pơgiong 54/71 hơnong pơkă mơ̆ tơlơi pơtrun Jơnum Ping gah tơring gloong tal XVII, rơwang thun 2020-2025 ba tơbiă. Yôm hloh lĕ bruă pơjing Ping gah, dưm dưm rĭm thun tơring glông pơmut 100 čô mơnuih apăn bruă Ping gah phrâo, rơgao rơbêh 10% tui hơnong pơkă. Abih bang 64 boh plơi pla hơmâo Khua git gai Ping gah ngă rah khua plơi ƀudah Khua anom bruă djop djuai ania mơnuih mơnam, rơgao 30% pơhmu hăng tơlơi pơtrun.

Ră anai Khul apăn bruă Ping gah tơring glông Sa Thầy glăk tŏ tui git gai 53 grup Ping gah ƀon lan pơphlôm ngă tui klă djop tơhnal, djơ̆ tơlơi pơkă hăng pơgiong bruă pơphun jơnum hlâo kơ lơ 10/2/2025. Hrŏm hăng anun git gai djop anih anom kơđi čar gir run pơgiong hơdôm hơnong pơkă bruă jao ba tơbiă hlâo anun kiăng kơ ngă atur brơi rơwang phrâo hăng tơlơi gir run tŏ tui hrưn đĭ bruă git gai, pran mă bruă kơtang, pơjing Ping gah hăng anih anom kơđi čar amăng tơring glông jai mă bruă tơpă sit, hơđong kjăp; gir run bơwih brơi tơlơi hơdip kơ mơnuih ƀôn sang jai hrơi trơi pơđao, yâo mơ-ak./.