VOV4.Jarai - Amăng bơyan phang thun 2021-2022 laih rơgao, grup K53 tơring čar Kon Tum hơmâo nao ĕp, klơi ba glăi 13 per tơlang tơleh tơhan djai pơsăn drơi ƀơi Lao hăng Kur. Sit biă ñu ƀơi 3 boh tơring čar anun lĕ Attapư, Sê Kông, Chăm Pa Sắc dêh čar Lao, grup K53 tơring čar Kon Tum hơmâo blơi ba glăi 7 per tơlang tơleh tơhan djai pơsăn drơi hăng ƀơi tơring čar Rattanakiri, dêh čar Kur, grup K53 tơring čar Kon Tum ăt klơi ba glăi 6 per tơlang tơleh.

Pơsat dor tơhan tơring glông Ngọc Hồi, tơring čar Kon Tum anih pơphun mơyut jôk, pơyua tơlang tơleh tơhan djai pơsăn drơi ƀơi dêh čar Lao hăng Kur

Khul git gai kơ bruă hyu ĕp, klơi pơƀut glăi hăng sem lăng anăn apăn ƀing tơhan djai pơsăn drơi tơring čar Kon Tum him lăng mơng lơ 30/5-2/6/2022 ƀơi 3 boh tơring čar Attapư, Sê Kông, Chăm Pa Sắc (Lao) amra pơphun jơnum ngă lơphet hlâo kơ ba glăi tơlang tơleh hrŏm hăng grup K53 glăi pơ dêh čar ta. Ƀơi tơring čar Rattanakiri (Kur), bruă pơphun ngă yang hlâo kơ ba glăi tơlang tơleh hrŏm hăng grup k53 glăi pơ dêh čar him lăng amra pơphun mơng lơ 6-8/6/2022. Amăng mông mơyut jôk, ba glăi dor 13 per tơlang tơleh hrŏm hăng grup k53 tơring čar Kon Tum ĕp, klơi pơƀut glăi ƀơi dêh čar Lao hăng Kur amăng bơyan phang laih rơgao him lăng amra hơmâo Ping gah tơring čar, Khul pơ ala mơnuih ƀon sang, Jơnum min mơnuih ƀon sang tơring čar, Jơnum min djop djuai ania mơnuih mơnam Việt Nam tơring čar Kon Tum pơphun amăng mơguah lơ 10/6/2022 ƀơi pơsat dor tơhan tơring glông Ngọc Hồi.

Siu Đoan: Pơblang