VOV4.Jarai-Mơguah lơ 2/3, ƀơi plơi prong Kon Tum, Jơnum min mơnuih ƀôn sang tơring čar Kon Tum hăng Jơnum min mơnuih ƀôn sang tơring čar Attapư dêh čar Lao hơmâo mông mă bruă, tŭ ư hrom bruă ngă hrom jơnum hrăm djru pơklaih mơnuih hơmâo tơlơi truh ia ling dăo, ia tơluh hăng lŏn tơhlom bơbeč truh tơlơi hơdip mơda mơnuih ƀôn sang amăng kual giăm guai dêh čar dua bơnah. Pơhiăp amăng mông jơnum, ơi Nguyễn Hữu Tháp, Kơ-iăng Khua tơring čar Kon Tum hăng ơi Bun Sơt Sêt Thi Lat, Kơ-iăng khua tơring čar Attapư pôr pơthâo tơlơi pơhing kơ bruă pơđĭ kyar bơwih ƀong huă mơnuih mơnam mơ̆ng dua boh tơring čar laih anun tơlơi răm ƀăm lŏn adai truh, apui ƀong răm ƀăm prong amăng hơdôm thun rơgao.

Mông jơnum hrom abih bang

Dua bơnah tŭ ư amăng mông jơnum kĭ pơkôl ngă hrom pok pơhai ngă tui hră pơtrun pơklaih mơnuih, pơsir tơlơi truh lŏn adai ngă. Amăng thun 2022 anai mơtam, dua boh tơring čar Kon Tum hăng Attapư amra ngă hrom pơtop bruă mă djru pơklaih mơnuih amăng mông ječ ameč, ia ling dăo hăng lŏn tơhlom hơmâo ƀơi guai dêh čar dua bơnah tơring čar. Anih pơphun pơtop hrăm lĕ ƀơi să Pơ Y, tơring glông Ngọc Hồi, Kon Tum.

Nay Jek: Pơblang