Ƀơi pơsat dor tơhan djai pơsăn drơi jăn tơring glông giăm guai Ngọc Hồi, Ping gah tơring čar, Khul pơ ala mơnuih ƀon sang, Jơnum min mơnuih ƀon sang, Jơnum min djop djuai ania mơnuih mơnam Việt Nam tơring čar Kon Tum pơphun mông mơyut jôk, hơ-ŭ hơdor, ba nao dor 12 per tơlang tơleh tơhan djru blah wang, ƀing rơgơi bruă mơng Việt Nam djai pơsăn drơi jăn amăng rơnuk blah wang ƀơi dêh čar Lao hăng Kur, hơmâo grup K53 hyu klơi pơƀut amăng bơyan phang thun 2022-2023.

Amăng hră pơđok amăng mông mơyut jôk, hơ-ŭ hơdor, ba nao dor 12 per tơlang tơleh tơhan djai pơsăn drơi, yă Y Ngọc, Kơ-iăng khua Jơnum min mơnuih ƀon sang tơring čar, Khua khul git gai 515 tơring čar Kon Tum ol kơdol: Ƀơi anăp tơlang tơleh tơhan djai pơsăn drơi jăn, pơ ala brơi Ping gah, gong gai, ling tơhan hăng mơnuih ƀon sang djop djuai ania tơring čar Kon Tum pơdah pran jua pơpŭ bơni, hơdor tơngia tơlơi gum pơgôp tuh rơyuh pran jua mơng ƀing tơhan djai pơsăn drơi jăn-ƀing mơnuih sông kơtang mơng dêh čar Việt Nam, ƀing mơnuih pioh glăi thun blan hiam klă hloh  kiăng djru blah wang, djai pơsăn drơi pơgôp pơklaih rơngai djuai ania hăng pran gum pơgôp giang mah jar kmar. Truh ră anai 12 per tơlang tơleh tơhan djai pơsăn drơi lêng kơ thâo abih anăn.