VOV4.Jarai-Thun blan rơgao bruă wai lăng lŏn tơnah ƀơi tơring čar Kon Tum ƀuh dŏ lu tơlơi aka ƀu găl, tơdu, ƀơi anăp rŏng ngă ƀu djơ̆, tơnap tap gleh glar. Anŏ răm ƀăm wơ̆t hăng rơnoh huač soh sel lŏn tơnah, dram gơnam kông ngăn Kơnuk kơna, ngă kơ lu mơnuih ƀôn sang ƀu đăo kơnang kơ ƀing ngă bruă apah bruă kơnuk kơna ƀong prăk blan kơ bruă wai lăng lŏn tơnah amăng tơring čar.

Sui mơ̆ng anai, 4 blan, lơ̆m nao ngă hră yua lŏn mơ̆ng sang anŏ hlăk dŏ ră anai, amai Nguyễn Thị Thanh Thúy dŏ pơ să Čư̆ Hreng, plơi prong Kon Tum ƀuh lŏn sang gơñu arăng ngă brơi hră djơ̆ glông lŏn sang pô pơkŏn.

“Lơ̆m kâo ƀuh kâo nao ngă hră rơkâo mơ-it kơ Jơnum min mơnuih ƀôn sang să. Să lăi glăi lĕ ƀu hơmâo tơlơi dưi pơsir ôh. Brơi kâo ngă hră mơ-it đĭ pơ plơi prong dơ̆ng. sa blan tơdơi aka ƀuh mơ̆n anom bruă mơ̆ng plơi prong lăi glăi. Phrâo anai, lơ̆m bưp mơnuih ruah khua, kâo ăt lăi pơthâo tơlơi anun gơñu lăi glăi tơlơi anai ƀu gleh lơi. Ngă hră rơkâo đĭ pơ dlông yơh, arăng hơmâo hơdră pơsir brơi ƀu tơnap tap ôh. dar nao rai tui anun, mông pơpă dơ̆ng kâo hơmâo pioh mă bruă bơwih ƀong huă čem ană bă”.

Phrâo anai ƀơi mông jơnum lok 3, khua mua pơ ala mơnuih ƀôn sang tơring čar Kon Tum tal XII, Khua git gai ping gah, Khua khul pơ ala mơnuih ƀôn sang tơring čar Kon Tum, ơi Dương Văn Trang tơña hơduah glăi bruă Jơnum min mơnuih ƀôn sang tơring kual Đak Hà, tơring glông Đak Hà kơ bruă ơi Đỗ Trọng Lâm, dŏ ƀơi jơlan Hùng Vương apah yua lŏn mơ̆ng thun 2017.

Lŏn amai Nguyễn Thị Thanh Thúy anom bruă kơnuk kơna ngă brơi hră djơ̆ glông hrom, anăn lŏn sang anŏ ayong Nguyễn Tăng Trung

Ră anai, lŏn anun ơi Lâm tuh ƀê tông ƀơi hnoh ia, man pơdong amăng jang ngă war pơga khŏp sĭ mơdrô. Ơi Ka Ba Thành, Khua git gai ping gah tơring glông Đak Hà lăi tơpă mơtam: tơlơi anun bơbeč prong biă mă kơ kơnuih hing ang mơ̆ng gong gai kơnuk kơna tơring glông:

“Mơnuih ƀôn sang amăng tơring glông ƀuh tơdah gong gai kơnuk kơna tơring glông ƀu brơi, hiư̆m pô anun dưi man pơdong anih anun. Laih anun tơdơi kơ ĕp lăng ƀuh tui anun biă mơ̆n, bruă wai lăng lŏn glai ƀơi tơring kual dŏ tơdu đơi. Lơ̆m anun ƀuh bruă mă soh laih pơsir samơ̆ ăt brơi pô anun man pơkra mơ̆n ngă kơ mơnuih ƀôn sang dŏ đing đăo gong gai kơnuk kơna yơh pô brơi, pô djru tui klôn”.

Pơdjơ̆ nao kơ bruă wai lăng lŏn tơnah ƀơi tơring čar Kon Tum, tui hăng tơlơi klah čun mrô 222 lơ 18/2/2022 mơ̆ng Anom bruă pel ĕp kơnuk kơna pơčrâo rơđah bruă mă tơdu, soh glăi lu kah hăng: Mơ̆ng thun 2016-2019 Jơnum min mơnuih ƀôn sang tơring čar Kon Tum kaih pơsit akŏ bruă mă yua lŏn mơ̆ng 10 boh tơring glông, plơi prong; 85 wơ̆t jao lŏn ƀu hơmâo ngă djơ̆ hơdră juă nua ƀơi tơring glông Đak Hà; kơčăo bruă sĭ mơdrô, pơkra anih anom hyu ngui hăng pơdong sang amăng plơi prong yua kông ty pơčruh ngăn gah Group FLC pô tuh pơ alin aka ƀu ngă giong ôh samơ̆ Anom bruă ngă hră yua lŏn tơring čar Kon Tum ngă brơi hră yua lŏn baih, ngă brơi hră pô sang, kông ngăn pơlir lir hơbit amăng lŏn anun laih anun mă yua hơdơ̆ kiăng amăng anih rơhaih 17.600 met karê; bruă jao lŏn kơ 43 čô pơkŏn dŏ ƀơi anih ngă plơi prong gah dơnung tơdrông tua ia krông Đak Ƀla, plơi prong Kon Tum ƀu djơ̆ anih pơdong plơi phrâo….

Đơ đam lŏn Jơnum min mơnuih ƀôn sang tơring kual Đak Hà brơi kơ Đỗ Trọng Lâm apah yua hlong man pơdong sang sĭ mơdrô anăn Con Cưng pioh sĭ mơdrô

Hrom hăng tơlơi dŏ tơdu anun, bruă ngă soh glăi hăng tơlơi phiăn pơkă hnong yua lŏn, wai lăng lŏn  tơnah, mă glăi lŏn tơnah ăt kah hăng lu bruă pơsir tơlơi soh glăi pơkŏn aka ƀu găl anun yơh ngă kơ lu mơnuih ƀôn sang Kon Tum ƀu đăo kơnang đơi dơ̆ng tah kơ khua mua, mơnuih apăn bruă kơnuk kơna. Amai Phạm Vân Kiều, sang dŏ amăng plơi prong Kon Tum hơmâo lŏn djơ̆ anih arăng pơkă kơ bruă pơkŏn ñu lăi:

“Djop anih pơkă lui soh. Mơnuih ƀôn sang kiăng hơmâo anih dŏ hơđong kjăp ƀơi lŏn sang anŏ pô samơ̆ ră anai, pơkă kơ bruă pơkŏn, ƀu brơi man pơdong, ngă sang ôh, hiư̆m mơnuih ƀôn sang khin đăo kơnang yua dah djop anih kơnuk kơna pơkă lui soh, djop anih lăi mă glăi lŏn".

Ơi Phạm Văn Trúc, mơnuih apăn bruă pơdơi abih thun bruă laih, dŏ pơ sang mrô 217, jơlan Hùng Vương, tơring kual Đak Hà, tơring glông Đak Hà lăi:

“Gơnong dlông lĕ mă bruă khut khăt laih, Mơnuih ƀôn sang gơmơi đăo kơnang biă mă. Samơ̆ hăng mơnuih ƀôn sang amăng dêh čar, hăng sa čô mơnuih ping gah amăng tơring čar Kon Tum lĕ kâo ƀuh bruă anai hăng tơring čar dŏ aka ƀu đing nao đơi ôh. Hơdôm bruă mă ƀuh hơmâo rơđah giong ĕp lăng, tơdơi pel ĕp ƀuh hơmâo soh samơ̆ ngă tui tơlơi klah čun jơnum giong ĕp lăng aka ƀu ngă khut khăt ôh. Hơmâo anih đơ đa lăi yua tơlơi anai, tơlơi anun tơnap đơi pơsir ƀơ ƀrư̆. Čang rơmang bruă anai khom ngă truh kih khom sir djơ̆ lăp”.

Phrâo anai ƀơi mông jơnum, kah hăng lok 3, khul pơ ala mơnuih ƀôn sang tơring čar Kon Tum tal XII; jơnum bưp nao rai hăng khua mua jơnum min mơnuih ƀôn sang tơring čar Kon Tum hăng ƀing ngă bruă sĭ mơdrô; jơnum khua mua ping gah tơring čar Kon Tum pơtong glăi boh tơhnal pơblih hơdră ngă hră pơar, pơblih hơdră jak iâu tuh pơ alin sĭ mơdrô…khua mua ping gah, jơnum min pơ ala mơnuih ƀôn sang, jơnum min mơnuih ƀôn sang tơring čar Kon Tum hơmâo pơdah rai pran jua mă bruă khut khăt brơi pơsir tơlơi soh glăi, rŭ pơdong, hăng jăm ƀuah hơdôm tơlơi ngă soh, ngă tơnap mơnuih ƀôn sang, anom bruă sĭ mơdrô sit nao ngă hră pơar pơdjơ̆ nao kơ lŏn tơnah.

Samơ̆ kiăng mă glăi tơlơi đăo kơnang mơ̆ng mơnuih ƀôn sang amăng bruă wai lăng lŏn tơnah lĕ khom khut khăt đôč aka djop ôh, djop sang bruă, gơnong bruă kơnuk kơna, djop gưl gong gai kơnuk kơna tơring čar Kon Tum kiăng ngă bruă ƀuăn rơ̆ng ba anăm lui kơ tơlơi gir run khut khăt,  tơlơi git gai pơčrâo ngă mơ̆ng khua mua pơ dlông jing hĭ kah hăng khua pơ dlông pơ-iă, khua pơyŭ rơ-ot ƀudah atông hơgor giong  glom lui tơlô̆ čing hơgor. Ta juăt lăi, tơlơi pơhiăp kah hăng tuh ia ƀơi hla rơbua đôč.

                                                                                    Khoa Điềm pô čih: Nay Jek pơblang