Lơ 16/3/1975, abih bang hơdôm khul ling tơhan mơ̆ng tơring čar Kon Tum hrŏm hăng Sư đoàn 968 kơsung mut mă glăi, ngă pô hơdôm kual ling tơhan, kơđi čar phun, tlaih rơngai đơ đam plơi prong Kon Tum hăng kual kơdư Dap Kơdư.

Amăng mông ngă lơphet hơdor glăi, ơi Lê Ngọc Tuấn, Kơ-iăng Khua git gai Ping gah tơring čar, Khua Jơnum min mơnuih ƀôn sang tơring čar Kon Tum pơtŏng sit: Tlaih rơngai Kon Tum jing tơlơi gru grua yôm phăn mơ̆ng Ping gah, khul ling tơhan hăng mơnuih ƀôn sang djop djuai ania amăng tơring čar, djru yôm phăn amăng bruă tañ mơ̆ng Bruă kơsung nao hăng tơgŭ hơkrŭ bơyan Bơnga thun 1975 tlaih rơngai đơ đam kual Dơnung dêh čar, pơlir hơbit lŏn ia. Ngă tui phiăn juăt sông kơtang, tơdơi kơ 50 thun tlaih rơngai, Ping gah, tơhan hăng mơnuih ƀôn sang djop djuai ania tơring čar Kon Tum hmâo yak rơgao laih lu tơlơi tơnap, tơlơi lông pơdŏng pơđĭ kyar plơi pla jai hrơi jai pơdrŏng asah klă hiam. Lu thun tơring čar Kon Tum dưi djă pioh rơnoh pơđĭ kyar bơwih ƀong ƀơi rơnoh đĭ lu. Truh ră anai mrô sang anô̆ ƀun rin dô̆ 4,31%; tơlơi hơdip mơda gơnam tam hăng pran jua mơnuih ƀôn sang dưi pơđĭ tui, ƀô̆ mơta plơi pla hăng plơi prong ƀu pơdơi pơplih phrâo./.