Amăng mông bưp ƀô̆ mơta, rơbêh kơ 120 mơnuih mơ̆ng Khul čih tơlơi pơhing phrâo tơring čar Kon Tum hăng ƀing khua pơ ala hmâo lok glăi phiăn juăt ư-ang 98 thun hrơi pioh kơ mơnuih čih tơlơi pơhing Việt Nam pơjing hăng pơđĭ kyar.

Pơhiăp amăng mông bưp ƀô̆ mơta, ơi Nguyễn Văn Hòa, Kơ-iăng Khua git gai Ping gah tơring čar Kon Tum pơtŏng sit bruă mă yôm phăn mơ̆ng hră pơhing phrâo amăng pơsit jơlan gah pôr pơhing, pơjing pran djơ̆ hrŏm amăng mơnuih mơnam, hơkrŭ đĭ pran đăo gơnang mơ̆ng mơnuih ƀôn sang amăng bruă git gai mơ̆ng Ping gah, wai lăng git gai mơ̆ng Kơnuk kơna djru ngă tuh kih hơdôm tơhnal bruă ba tơbiă, bruă jao pơđĭ kyar bơwih ƀong - mơnuih mơnam mơ̆ng tơring čar. Pri Hră pơhing phrâo tơring čar Kon Tum tal 11 hmâo čơkă mă 60 mơta tơlơi čih. Khul pơphun bruă pơplông hmâo plĕ hră čom puang ruah 27 mơta tơlơi čih thâo hloh pioh ƀơk pri. Tal anai, Khul čih tơlơi pơhing phrâo tơring čar Kon Tum ăt hmâo ƀơk laih Kỷ niệm chương yua kơ bruă čih tơlơi pơhing Việt Nam mơ̆ng Khul wai lăng bruă pôr pơhing dêh čar Việt Nam kơ 2 čô mơnuih čih tơlơi pơhing phrâo./.