VOV4.Jarai-Tlam lơ 12/9, Anom pơtô bruă ping gah tơring čar Kon Tum pơphun jơnum jak iâu tal pơplông hơduah ĕp “Kon Tum 110 thun man akŏ pơdong hăng pơđĭ kyar”. Tal pơplông anai pơphun dua hơdră: Pơplông čih hăng pơplông rek djơ̆ hơdôm tơlơi lăi glăi sit nik amăng plang tơlơi pơhing internet sang bruă Pơtô bruă ping gah tơring čar Kon Tum. Hơdră pơplông čih ră ruai, hơmâo 3 mơta tơlơi tơña laih anun mơ-it tơlơi pơplông lăi glăi laih amăng lơ 20/11/2022.

Mông jơnum jak iâu pơplông

Hơdră pơplông trắc nghiệm rek mă glông lăi glăi djơ̆ pơphun amăng 3 blan, mơ̆ng 6 mông lơ 13/9 truh 9 mông mlam lơ 13/12/2022. Khul čom puang amra pơphun pơƀut tal pơplông laih anun ƀơk pri tal pơplông hlâo kơ lơ 5/2/2023. Tal pơplông anai kiăng pôr pơthâo, pơtô hrăm kơ djop gưl Mơnuih ƀôn sang, boh nik ñu ƀing hlăk ai čơđai rơnuk anai thâo hluh rơđah gru phun akŏ pơdong hăng pơđĭ kyar tơring čar Kon Tum. Mơ̆ng anun, djru hrom pơđĭ tui tơlơi thâo hluh kơ bruă djă pioh, pơđĭ tui rơnoh yôm gru grua phun hăng gru grua hiam plơi pla, tơring čar, lŏn ia.

Nay Jek: Pơblang