VOV4.Jarai - Lơ 1/6, Gơnong bruă gru grua, bơrơguăt drơi jăn hăng tuai čuă ngui tơring čar Kon Tum hơmâo pơphun jơnum klah čun hăng jao pri pơplông kač rup ƀing čơđai anet, hăng anăn “Anih ngui ngor mơ-ak klă kơ ƀing čơđai”. Tơdơi kơ 5 blan pơphun, Khul pơphun pơplông kač rup ƀing čơđai hăng anăn “Anih ngui mơ-ak klă kơ ƀing čơđai” hơmâo tŭ mă rơbêh 5.700 pok rup mơng ƀing čơđai sang hră gưl sa hăng gưl dua amăng tơring čar Kon Tum.

200 pok rup pơdă prưng amăng Sang djă pioh gơnam yôm tơring čar Kon Tum

Găn rơgao hơdôm rơwang čom puang, 200 pok rup hiam hloh dưi nao pơplông rơnuč hăng hơmâo arăng pơdă prưng, lăi pơthâo ƀơi Sang djă pioh gơnam yôm - Sang pơđok hơdrôm hră tơring čar Kon Tum. Hrŏm hăng mông jơnum klah čun hăng jao pri tal pơplông kač rup kơ ƀing čơđai, ƀrô hrơi jar kmar pơpŭ kơ ƀing čơđai lơ 1/6, amăng hơdôm hrơi anai tơring čar Kon Tum ăt glăk pơphun lu bruă mă kiăng pơdah tơlơi đing nao ƀing čơđai.

Siu Đoan: Pơblang