Yă Trương Thị Ngọc Ánh, Kơ-iăng Khua Jơnum min djop djuai ania mơnuih mơnam Việt Nam nao jơnum hrŏm hăng pơhiăp git gai mông jơnum. Jing anih anom yôm kơ bruă pơgang rơnuk rơnua ƀơi tơrring čar Kon Tum, tơring glông Đak Hà, hơmâo đơ đam lŏn glai truh 84.500 ha hăng mrô mơnuih 87.000 čô laih anun hơmâo 18 djuai ania adơi ayong dŏ hrŏm.Thâo rơđah tơlơi yôm mơ̆ng bruă akŏ pơjing Khul gum hrŏm abih bang ană plơi pla djru pơgang tơlơi rơnuk rơnua dêh čar, rơnuk rơnua mơnuih mơnam, bơwih brơi bruă pơtrut pơđĭ kyar bơwih ƀong huă mơnuih mơnam, gru grua ƀơi tơring glông hăng tơring čar, laih dơ̆ng tơring glông Đak Hà, hơmâo pơphun 188 wơ̆t jơnum pơtô lăi ană plơi djru pơgang tơlơi rơnuk rơnua dêh čar kơ 37.000 wơ̆t mơnuih nao pơhmư̆.

 Pơhiăp git gai mông jơnum, yă Trương Thị Ngọc Ánh, Kơ-iăng khua jơnum min djop djuai ania mơnuih mơnam Việt Nam rơkâo gong gai kơnuk kơna, ling tơhan djop anom bruă djru hrŏm pơgang tơlơi rơnuk rơnua lŏn ia, kiăng kơ bruă ngă hrŏm mơ̆ng abih bang mơnuih ƀôn sang pơgang lŏn ia rơnuk rơnua jai hrơi tŭ yua hăng djơ̆ lăp.