VOV4.Jarai - Jơnum min mơnuih ƀon sang tơring čar Kon Tum phrâo pơphun Jơnum mă tơlơi pơhing phrâo kơ bruă pơphun ngă tui tơlơi Klah čun mrô 222 lơ 18/2/2022 mơng Anom bruă Hơduah ĕp kơđi Kơnuk kơna. Ơi Nguyễn Hữu Tháp, Kơ-iăng khua jơnum min mơnuih ƀon sang tơring čar Kon Tum brơi thâo: Jơnum min mơnuih ƀon sang tơring čar git gai hơdôm anom bruă, plơi pla bơdjơ̆ nao hyu sem lăng, pok pơhai pơsir tơlơi aka ƀu djơ̆ mơ̆ ƀing hyu hơduah kơđi Kơnuk kơna črâo brơi. Hăng hơdôm tơlơi soh amăng bruă wai lăng, mă yua lŏn tơnah; bruă wai lăng man pơkra; Čuk pơkra, man pơdong plơi prong...mơ̆ Ƀing hơduah ĕp kơđi Kơnuk kơna Tum pơƀut glăi, Jơnum min mơnuih ƀon sang tơring čar Kon Tum amra git gai hơdôm anom bruă, plơi pla bơdjơ̆ nao ngă tui klă, pơhlôm djơ̆ hăng tơlơi phiăn ră anai.

Anih jơnum mă tơlơi pơhing phrâo.

Kơ bruă arăng ƀong prăk mơng anăn sâm Ngọc Linh, khua Gơnong bruă hmua hăng pơđĭ kyar plơi pla tơring čar Kon Tum brơi thâo, ră anai hơmâo lu khul grup, mơnuih hyu leč mă anăn sâm Ngọc Linh Kon Tum či sĭ gơnam pơ sang čơ hăng ƀơi plang internet. Tơring čar amra hyu hơduah ĕp, sem lăng đah mơng pơgăn hĭ tơlơi anai.

Siu H’Mai: Pơblang