VOV4.Jarai-Ƀrô hơdor glăi 50 thun hrơi blah dưi Đak Tô-Tân Cảnh lơ 24/4, ƀơi tơdron lăk lơ 24/4 tơring kual Đak Tô, tơring glông Đak Tô, Ƀirô ping gah, jơnum min pơ ala mơnuih ƀôn sang, jơnum min mơnuih ƀôn sang, jơnum min djop djuai ania mơnuih mơnam Việt Nam tơring čar Kon Tum, jơnum ngă lơphet prong biă mă hơdor glăi 50 thun blah dưi ƀơi Đak Tô-Tân Cảnh laih anun tŭ mă hră pơsit anăn gru blah ngă đưm dêh čar yôm phara gru phun kơ lŏn ia ƀơi anih kơdư dlông 1015 hăng kơdư dlông 1049.

Djă pioh gru ai hơtai khin hơtai blah ngă Đak Tô-Tân Cảnh, 50 thun rơgao Ping gah, gong gai kơnuk kơna, mơnuih ƀôn sang djop djuai ania tơring glông Đak Tô lăi pha, tơring čar Kon Tum hnun mơ̆n thâo gum pơgôp, tŭ ư sa pran jua, pơtum pok pơhai ngă tui tŭ yua jơlan hơdră, Hră pơtrun, boh nik ñu Hră pơtrun mơ̆ng ping gah tal XIII mơ̆ng dêh čar, Hră pơtrun ping gah tal XVI ping gah tơring čar laih anun dưi tŭ mă boh tơhnal yôm biă mă.

Mông ngă jơnum lơphet

Ƀơi mông jơnum, hơdor glăi 50 thun blah dưi Đak Tô-Tân Cảnh, Ping gah, gong gai kơnuk kơna, ling tơhan hăng mơnuih ƀôn sang tơring čar Kon Tum hok mơak biă mă tŭ mă hră pơsit mơ̆ng Khua dêh čar kĭ pơhrua nao anih anăn Kơdư dlông 1015 hăng kơdư dlông 1049 gah tơring glông Sa Thầy hăng Đak Tô jing anih gru phun dêh čar yôm phara jing anih hing ang djă pioh gru grua blah kơtang dưi ta hăng ayăt ƀơi Đak Tô-Tân Cảnh. Pơđut jơnum, ƀing khua mua lăng hơdră tơlơi adoh suang mơak hiam biă mă hăng anăn “Đak Tô-Tân Cảnh-Sa rơnuk apui bơnga phao kơtuang”.

Nay Jek: Pơblang