VOV4.Jarai-Ping gah tơring čar Kon Tum hơmâo ngă hră pơsit pơsir bruă soh glăi brơi pơdơi abih bruă apăn amăng ping gah hăng ơi Đặng Thanh Nam, Kơ-iăng Khua git gai ping gah tơring glông, Khua Jơnum min mơnuih ƀôn sang tơring glông Kon Plong. Dưi thâo, phun ñu  ngă kơ anom bruă ping gah tơring čar khom brơi pơdơi bruă apăn amăng ping gah hăng ơi Đặng Thanh Nam lĕ pơdjơ̆ nao tơlơi ñu ngă soh wai lăng lŏn tơnah hăng tuh pơ alin man pơdong.

Kơčăo bruă man pơdong sang Biệt thự gah kơdư plơi phun tơring glông Kon Plong ngă soh glăi tơlơi phiăn kơnuk kơna tuh

pơ alin kơ bruă čar

Rơđah biă ñu, bruă ơi Đặng Thanh Nam git gai man pơdong kơčăo bruă yua lŏn amăng anih pơdong sang pơprong Biệt thự gah kơdư plơi phun tơring glông Kon Plong truh 21 ha, lơ̆m aka ƀu pơblih hơdră yua lŏn, aka hơmâo hră brơi ngă tui tơlơi phiăn kơnuk kơna pơtrun kơ bruă tuh pơ alin bruă čar. Anom bruă ping gah tơring čar Kon Tum pơsit, tơlơi soh mơ̆ng ơi Đặng Thanh Nam ngă răm ƀăm kơtang, pioh glăi tơlơi pơhing ƀu klă hiam amăng mơnuih ngă khua, mơnuih ping gah hăng mơnuih ƀôn sang; ngă rơngiă kơnuih anom bruă ping gah, gong gai kơnuk kơna tơring glông hăng drơi jăn ñu pô ơi Đặng Thanh Nam.

Nay Jek: Pơblang